IA: Nioqqutissat akiisa qaffatsinneqartarnerat killilersimaarneqassaaq
- Akit qaffasippallaartarnerat takussaasorujussuanngorpoq, nioqqutissat akii eqqarsaatigalugit allatigullu ulluinnarni atortakkatsinni akit aamma qaffaateqartarlutik, taamaammat siunnersuutigaarput akit qaffatsinneqartarnerat pakkersimaarniarlugu qaffatsinneqarsinnaanerat killilersimaarneqarsinnaasariaqartoq, IA’p atuisartunut tunngassuteqartunut oqaaseqartartuat Olga P. Berthelsen oqarpoq.
Nioqqutissat akii assigiinngitsut Danmarkimut naleqqiullugit qaffasippallaarnerat Radioaviisimi ippassaq tusarliutereerlutigit Olga P. Berthelsen tamanna pillugu Inatsisartuni siunnersuusiulersaarpoq.
Olga P. Berthelsen assingusumik siornatigut siunnersuusioreerpoq, 2006-imi taamatut siunnersuuteqarami. Sulisitsisut Peqatigiiffiata GA-p tusarniaavigineqarnera pissutaatinneqarluni Naalakkersuisut siunnersuut taamanikkut itigartippaat.
