IA: Naak naalakkersuinikkut ingerlatsinermi tamat oqartussaaqataanerannik isuma?

Apeqqut tamanna silap pisussaa pillugu naalakkersuinikkut politikkimut tunngavoq.

Suut toqqammavigalugit Kim Kielsenip silap pissusia pillugu isumaqatigiinniarnerit aallartippai? Naalakkersuisuni ilaasortap inuussutissarsiornermik ingerlatallit attaveqarfigisimanerpai? Aamma naalakkersuisup Kattuffiit inatsisartunilu avatangiisit pillugit ataatsimiititaliat isumasiorsimavai? Aamma Naalakkersuisuni ilaasortap silap pissusia pillugu periusissaa piareeqqava? Inatsisartunilu tusarniaassutigineqareerpa?

Apeqquterpassuit tamakku akineqarnissaat Inuit Ataqatigiit ujartorpaat, ilaatigut Kalaallit Nunaata silap pissusaa pillugu periusissaata ammasumik oqallisigineqarnissaanik aappagu Københavnimi sila pissusaa pillugu ataatsimeersuartoqannginnerani isummanik ujartuinerminni.

Aamma Naalakkersuinikkut ingerlatsinermi tamat oqartussaaqataanerannik isumap naalakkersuisunit ataqqineqarnissaa piumasarineqarpoq, oqallittoqarnissaalu naalakkersuisunut suliareqqullugu.

Naalakkersuisut illuinnaasiortumik ingerlatsinerat unittariaqarpoq, oqartussaaqataanermik ingerlatsineq annertunerusoq eqquttariaqarparput, pingaartumik nunat tamalaat silap pissusaa pillugu isumaqatigiissutigisinnaasatta pingaaruteqaqisup suliarinerani, sunik toqqammaveqassanersoq eqqarsaatigalugu, Josef Motzfeldt aamma Juliane Henningsen naalakkersuisunut allakkaminni taama oqarput.