IA: Meeqqat ikiorneqarnissaat tullinnguuppoq
Inuit Ataqatigiinneersut Inatsisartut ataatsimiinnissaannut katillugit 27-nik siunnersuuteqassamaarput. Meeqqat atugarliortut eqqartorneqaqqinnerisa kingorna, aaqqiissuteqarnissaq politikkikkut tapersersorneqarlualerunarmat, Inuit Ataqatigiit siunnersuutigeriikkaminnik saqqummeeqqilersaarput.
- Meeqqat atugarliortut ikiorsiiffigineqarnissaannut atatillugu, ataqatigiissaakkamik suliniuteqartoqartariaqarpoq, mikisualukkuutaarlugu aggualullugu iliuuseqallattaalluni tamakkiisumik ikiorsiisoqarsinnaanngilaq. Soorlu naammattunilluunniit aningaasanik tapiiffigitikkaluaraanni ineqarnerlukkaanni immini taanna aaqqiinertut oqaatigineqarsinnaanngilaq, imaluunniit angerlassimaffigissaaraluarluni ullut tamaasa ernguttoqartarpat, tamanna aqaguani meeqqat atuariartornissaannut tamanna ajoqutaavoq. Taamaammat ataatsimoorussamik iliuuseqarnikkut aaqqiiniartoqartariaqarpoq, Inuit Ataqatigiit siulittaasuat, Kuupik Kleist oqarpoq.
Inuit Ataqatigiinniittaaq siunnersuutigineqarpoq, meeqqat 18-niliisaat tikillugu aningaasanik katersitinneqartarnerannut taarsiullugu, atuartut nerisarfilerlugilluunniit ataatsimut nerisineqartalernissaat. Tassami nerisitsinissaq kisimi isiginiarneqarani aammali atuartut ataatsimut nereqatigiittarnermikkut qinngasaaruttarnerisa annikillisarnissaat, ataqatigiinnerulernissaat kiisalu imminnut ataqqeqatigiinnerulernissaat anguneqarsinnaammat.
