IA-kkormioq: Naalakkersuisut naveernissaat pissusissamisoorneruvoq

Isumaginninnermut naalakkersuisoq, Maliina Abelsen, ilaqutariinnut sullissivinnut siorna aningaasaliissuteqarpoq. Kisianni Aningaasaqarnermut ataatsimiititaliamut qinnuteqaqqaarani taamaaliorpoq. Tamannalu Inatsisartut inatsisaat normu 8 1999-imeersoq malillugu inatsimmik unioqqutitsineruvoq.

Taamaammat Maliina Abelsenimik, Danmarkimiikkami ullumi Inatsisartuniinngitsumik, tatiginnikkunnaarneq pillugu taasisoqarnissaanik Siumut Atassullu ullumi siunnersuuteqarput.

- Nunami maani inatsit malinnagu ingerlatsisoqarsinnaanngimmat, taamatut saqqummiussaqarpugut. Innuttaasut, Inatsisartut Naalakkersuisullu inatsisit malittussaavaat. Inatsisinik unioqqutitsineq nalinginnaassangilaq, Siumup kukkunersiuinermut ataatsimiititaliami ilaasortaatitaa, Kristian Jeremiassen, taama oqarpoq. Tassalu Maliina Abelsenip tunuartitaanissaa kisaatigaa.

- Naalakkersuisunut ilaasortaq tunuartariaqarpoq, tassami atuuffimmut pigami pisussaaffiit suunersut ilisimareertariaqarpai.

Kisianni Maliina Abelsenip tunuartitaanissaa pissusissamisuussagaluarpoq, piaaraluni imaluunniit mianersuaalliorujussuarnermigut taamaliorsimagaluaruni.

Tamannalu Maliina Abelsenip annassutigigaa, IA-meersoq Olga P. Berthelsen oqaluttuarpoq. Tassalu partiit Naalakkersuisuutitaqartut tatiginnikkunnaarnissamik siunnersuut itigartippaat.

- Suliat taamatut ingerlanneqarsimanerat isornartoqartoq, Inatsisartut Aningaasaqarnermut Ataatsimiititaliaat aammalu Kukkunersiuinermut Ataatsimiititaliaat isumaqarput. Tamannalu aamma ersarissumik isornartorsiutigineqarpoq. Isornartorsiullu Naalakkersuisut tigulluarpaat nalunaarutigalugu, siunissami taamatut pisoqaqqinnginnissaa suliniutiginiarlugu. Tamannalu uagut Kukkunersiuinermut Ataatsimiititaliami tamattaalluta tamakkiisumik tusaatissatut tiguarput, Olga P. Berthelsen oqarpoq.

Naalakkersuisut siulittaasorigallagaat, Jens B. Frederiksen, aamma taama isumaqarpoq, Maliina Abelsen soraarsinneqassanngitsoq oqarluni.

- Isumaqarpugut, pissuserissaarluni akisussaassuseqarlunilu taamani iliuuseqarsimasoq.

Ima nassuiaavoq:

- Naalakkersuisunut ilaasortap kukkusoqarsimasoq paasigamiuk, ingerlaannavik aaqqinniarlgu iliuuseqarpoq, taavalu Naalakkersuisunut, Aningaasaqarnermut Ataatsimiititaliamut aamma Kukkunersiuinermut Ataatsimiititaliamut nalunaarutigalugu. Tassuuna takutippaa, piaaraluni unioqqutitsinissaq ataatsimilluunniit siunertarinagu. Taamaammat uagut Naalakkersuisuni tatigaarput.

Olga P. Berthelsen kukkunersiuinermut ataatsimiititaliami ilaasortaavoq. Tassalu ataatsimiititaliaq aallaqqaammut Maliina Abelsenimik isornartorsiuivoq. Kisianni naveersisoqassappat Maliina Abelsen kisimi pineqassanngitsoq isumaqarpoq.

- Qingaliisoqassappat, taava isumaqarpunga Naalakkersuisut tamarmik qingalerneqassasut.

(Naveersisoqassappat, taava isumaqarpunga Naalakkersuisut tamarmik naveerneqassasut. Webimi aaqq.)

Tassami Naalakkersuisut ataqatigiittumi sulisimanngitsut Olga P. Berthelsen tunngavilersuivoq:

- Naalakkersuisoqarfiit akornanni pappialarsornikkut sulinerup aaqqissorneqarnera pitsaanerusariaqarpoq. Taanna aamma Kukkunersiuinermut Ataatsimiititaliap oqaatigaa. tamannalu pitsaanerulissasoq, Naalakkersuisut neriorsuutigaat.

Kisianni naalakkersuisut naveerneqarnissaat naammanngitsoq, Siumut isumaqarpoq:

- Naalakkersuisut akuersaaginnarnerat ulorianarluinnarpoq, Kristian Jeremiassen oqarpoq.