IA kisitsisinik saqqummiussivoq

Nakkutilliinermut tunngasunik ataatsimoorussamik saqqummiussinerminni, naalakkersuisoqatigiit aalisarnermik nakkutilliinermut atuisunik akiliuteqartitsisalerniarput.

Angallatit mikinerit ukiumut ataasiartumik aalisakkanik tunisassiaasunik atuinerminni akiliutissaat 1.500 koruuniussasoq IA-p siunnersuutigaa, matumani pineqarlutik assagiarsuttassat, saarullittassat aalisagartassallu allat tunisassiorfinnut tunineqartussat.

Angallatinut anginernut sinerissamut qanittumi aalisartunut, pisassiissutinut ataasiakkaanut ukiumoortumik 1.500 koruuninik akiliuteqartoqartassasoq siunnersuutigaat. Tassa assagiarsuttassiissutinut ukiumut 1.500 koruunit, saarullittassiissutinut ukiumut 1.500 koruunit ilaalu ilanngullugit.

Naalakkersuisoqatigiit aalisarnermik piniarnermillu inuussutissarsiuteqarnerup nakkutigineqarnerat sukateriffiginiarpaat, taamaalilluni pisarineqartartut ajornannginnerusumik nakkutigineqarsinnaalerniassammata.

Nakkutilliinerup sukateriffigineqarneratigut, aalisarnerup Nunatta aningaasarsiornikkut inuiaqatigiinnilu maannakkornit iluanaarutaasinnaanerata qaffassarneqarnissaa, IA sinnerlugu Inatsisartunut ilaasortap Hans Aronsenip neriuutigaa.