IA: Kammalaatersorneq nutaaliortitsinissamut akornusiivoq
Kammalaatinik atorfinnut qaffasissunut inissiinissaq pingaarnerutinneqarpoq, inunnik atorfimmut tulluartunik ilinniagaqarluarsimasunillu sulisoqarnissaq tunulliullugu, Kommunimi Kujallermi Inuit Ataqatigiit ilaasortaatitaat, Narsami kommunaldirektørimik tusagassiisarnermut pisortaanertut atorfinitsitsisoqarnera pillugu.
Simon Simonsen, Ikaarsaariarnermi Ataatsimiisitaliap siulittaasua oqarpoq, kommunini qinikkat tamarmik atsioqatigiiffigisimagaat atorfilittanik soraarsitsisoqannginnissaa nassuerutigingajallugulu atorfik pineqartoq kommunaldirektørimut inuttalugaareersimanera.
Uani julip aallaqqaataa tikitsinnagu atorfinittussat inissittariaqarput qammatit arfinillit periarfissaqartitaammata, isumaqatigiissuteqarnikkut, ukiortaaminngaanniit qanoq atorfeqarnerat qiviassagutsigu.
Tassa ima paasinarpoq, taanna atorfik pilersinneqartussanngormat, taava eqqarsaatigineqarsimasoq kommunaldirektøriusup massakkut Narsamiittup atorfigilissagaa soraarsinneqannginniassammat?
Tassa taama oqarsinnaavu…imatut..taamatut toqqaannavissumik oqartoqarsinnaanngilaq. Ilisimaneqartutut taamatut qinikkatut sulinermi atorfigineqarsinnaanngitsut ilaat aamma ilisimaneqarput. Assersuutigiinnarlugu sulisunut tunngasunik qinikkatut..ææh..inissisimatilluni aamma atorfeqartoqarsinnaanngilaq, taamaammat tamakkua qiviartiterlugit inissiinissaq taanna tulluartutut isigisimavarput. Aamma isumaqarpugut ataatsimilluunniit uparuagassartaqanngitsoq
Ukiup affaanit sioqqutisumik atorfillit allamik atorfeqalernissaat tunngavigalugu tuaviortumik sunik suliaqalernissaanik utoqqatsissuteqarneq tunngavissaqanngitsoq Inuit Ataqatigiit allapput, tjenestemanditut atorfillit suliffimmi allannguisoqartillugu suliamik allamik naapertuuttumik suliaqartinneqarsinnaammata.
Atorfimmik inuttassarsiornermi piffissaliussap sivitsorneqarnissaa Inuit Ataqatigiit kissaatigisimagaluarpaat akuerineqanngitsumik.
