IA Ilulissat: Allatut ilusilersuinissaq kingusinaareerpoq
Qaasuitsup Kommunissaa piareersarlugu suliarujussuaq ingerlareersoq, Siumut kinguartitsiniarpat, maangaannassaaq, Ilulissani Inuit Ataqatigiit siulittaasuat Bendt B. Kristiansen oqarpoq.
Allattoq Louise M. Kleemann
- Qaammatit pingasuunngitsulluunniit qaangiuppata kommunerujussuanngortitsisoqassaaq, taamaattumik allatut ilusilersuinissaq kingusinaareerpoq, Bendt B. Kristiansen oqarpoq.
Innuttaasut aamma toqqissisimatinnissaat pingaaruteqarnerarpaa.
-Pingaartumik aamma sulisut toqqisisimasariaqarput, toqqissisimannginnermi aallartereersoq annertusaqqittariaqanngilaq, pingaartumik amerlanerussuseqarlutik qinikkatut sulisut akornanni. Qaammatialunnguimmi qaangiuppata ukiortaassaaq, Bent B. Kristiansen oqarpoq.