I.A.: Ikaarsaariarnermi ataatsimiititaliat ikorfartorneqartariaqarput
Kommunerujussuit toqqissisimanartumik aallartinnissaannut pisariaqartut assigiinngitsorpassuit angumerineqarsinnaajunnaalerput. Inuit Ataqatigiinniit isumaqarpugut kommunalbestyrelsingortussanut ilaasortassatut qinikkat naammaginartunik atugassaqartinneqartariaqartut, taamaanngippat, soorlu aningaasatigut annikilliorlutik suliniaraluarunik, naammassisassatik tamaasa naammassissagaat naatsorsuutigisinnaanngilarput. Inuiaqatigiit torersumik pitsaasumillu ukiuni aggersuni aqunneqarnissaat piumasarineqarpoq, taamaammat toqqissisimanartumik aqutsinissaannik isumalluutigisagut aningaasatigut ikorfartortariaqarput. Taamaanngippat inuit pitsaasumik sullinneqarnissaat inuiaqatigiillu ingerlanneqarnerannut sunneeqataanissaminnut periarfissaat pilliutigineqassapput, Inuit Ataqatigiit siulittaasuat, Kuupik Kleist oqarpoq.