Kiffartuussinissamik isumaqatigiissutit IA-p naammaginartinngikkai
Tassami angalasut nunap ilarujussuani sullinneqarnerat ajorseriassasoq isumaqarput.
- Ikinnerussuteqarluta oqaaseqaateqarpugut ernumassuteqaratta. Innuttaasut kiffartuunneqarneranni ajorseriaatissanik erseqqissunik takusaqarsinnaagatta, IA-p siulittaasua Sara Olsvig oqarpoq.
Taassuma ingammik angalaffiusartut, siullermik piginneqatigiiffimmi ataatsimi timmisartumut billettiseriarluni ingerlaqqinnermi piginneqatigiiffimmi allami billettisiffiusartussat, ernumanartoqartippai.
Tassami assersuutigalugu Qasigiannguanit Nuummukkarniartunut siunissami imaalissaaq, angalanerup aallaqqaataani Disko Linemit angallanneqariarlutik angalanerup sinnerani Air Greenland angallanneqartassallutik.
- Ingerlatseqatigiiffit marluk atorneqartussanngorput, aamma timmisartuussinerni. Angalasussarlu taamaalilluni kipiluttunartumik inississinnaasassaaq, assersuutigalugu sila peqqutigalugu kinguaattoortoqarpat, ingerlaqinnissaminullu timmisartuunneqarnissaminut anngutinngitsooruni, Sara Olsvig KNR-imut taama oqarpoq.
Kiffartuussinissamik isumaqatigiissutit 2016-imi ukiup affaani siullermi naammassissallugit, Naalakkersuisut siorna neriorsuipput, tamaaliunngillalli, tamatumanngalu IA isornartorsiueqaaq.
Taamaammat kiffartuunneqarnissaq pillugu isumaqatigiinniarnissat tullissaannut tunngasumik Sara Olsvig Naalakkersuisunut kaammattuuteqarpoq.
- Pisariaqarpoq, suliap uuma siusissukkut naammissisarnissaa, ingerlatseqatigiiffiit innuttaasullu pilersaaarusiorsinnaanerat pillugu.