IA: - Eqqumiitsuliortut tunulliunneqarput!
Inatsisartuni ilaasortap Inuit ataqatigiinneersup Juliane Henningsenip akuersaarnartuutinngilaa Naalakkersuisut Aningaasanut Inatsisissatut siunnersuutaanni Sisimiuni amernik, atisanik eqqumiitsuliornermillu suliaqarluni Ilusilersuinermik ilinniarfik kinguartinneqalernera.
- Isumaqarpunga naalakkersuisut kulturimut politikkianut tamanna ersersitsisoq. Kiisalu una ilusilersuinermut ilinniarfik kinguartinneqalermat akueriuminaatsittorujussuuara, pissutigalugu ilinniarfik aallarteriaannarnikuugaluartoq maanna ilinniartussat qinnuteqarsimagaluartut kinguartittariaqalissavaat, Juliane Henningsen oqarpoq.
Taanna qalleqqissaavoq, naalakkersuisut 2009-mut neriorsuutigisinnaanngikkaat aningaasanut inatsimmut inissaqartissinnaassanerlugu.
- Suliaq annertoorujussuaq maangaannaq unissappat assut akueriuminaatsussaavoq suliaqarsimasunut inuiaqatigiinnullu tamanut, Juliane Henningsen oqarpoq.
Juliane Henningsen allakkiamini allappoq Inuussutissarsiutinut Ilinniartitaanermut naalakkersuisoq Siverth K. Heilmann ajornanngippallaamik oqarsimasoq; tassami taanna oqarpoq; neriunartoq 2009-mut aningaasanut inatsimmi sanalunnermik ilinniarfimmut aningaasanik nassaarsinnaajumaarlutik.
- Taamannak oqarsinnaaguni takutiinnarpaa taanna ilinniarfissaq ilumut pimoorunniarnagu aningaasanut inatsimmut inissaqartikkumallugu, oqarpoq, nangipporlu:
- IA-mi isumaqarpugut sorsuutigisariaqaripput ukiup tulliani aningaasanut inatsimmut taanna ikkunneqartariaqartoq, tassami atuarfissaq taanna sanalunnikkut nunatsinni ineriartoqqinnissatsinnut qulakkeerinnittussaavoq, aammalu kalaallit sanaloriaasitoqaat tassani ilaalluinnarmat iluatsinnartuusoq piaartumik taassuma ilinniarfiup aallartinnissaa, oqarpoq.
Juliane Henningsen aperaarput, ilinniarfik pineqartoq akisussaqimmat aningaasat suminngaanniit aaneqassanersut.
- Ukiuni makkunani ilinniartitaanikkut immikkut qaffassaaniarnitsinni aningaasarpassuit 100 millionilikkaat atorniarneqarput, taavalu tassuunakkut tulleriiaarinermi assarsornikkut ilinniartitaaneq tassani inissaqartariaqarpoq. Soorunami eqqumiitsuliornikkut assassornikkullu ineriartortitsineq aningaasassaqartinngikkutsigu unittooqqalluinnartussaassaaq siunissami, taamaattumik tamanna siunissamut aningaasaliinerussaaq unalu piviusunngoraluarpat eqqumiitsuliortunut assassullaqqissunullu inunnut periarfissaq annertoorujussuaq tunniunneqartussaagaluarpoq.
Juliane Henningsen aamma oqarpoq timersornermut 1,9 mio. koruuninik tapiisoqarsinnaassappat aamma kulturimut tunngasunut suliniartut aamma qaffaavigineqartariaqaraluartut.
