IA Demokraatit: Amigartoornermut akisussaatitsisoqartariaqarpoq

Inatsisartuni ilaasortaq Inuit Ataqatigiinneersoq Ane Hansen, KNI-p ukiup affaani siullermi 75 million koruuninik amigartooruteqarnera pillugu Naalakkersuisunut apeqquteqarpoq.

KNI-mi ukiup affaani siullermi 75 million koruuninik amigartooruteqarneq, tamatumalu kingunerisaanik nunaqarfinnut sullissinerup ajorseriannginnissaa Naalakkersuisut qanoq qulakkeerniarneraat iliuuseqarfiginiarneraallu, Ane Hansenip paaserusuppaa.

Arctic Green Food, KNI-p piginneqataaffigisaa 27,8 million koruuninik aamma amigartooruteqarmat piginneqataassutit 5,3 million koruunit annaaneqarput, tamanna Naalakkersuisut qanoq iliuuseqarfiginiarneraat Ane Hansenip aamma apeqqutigaa.

Amigartooruteqarnertaaq KNI-p aqutsisoqarneranut siulersuisoqarneranullu Naalakkersuisut tungaannit sunniuteqartinneqassanersoq Ane Hansenip aamma paasiumavaa.

Ane Hansenip taama apeqquteqarnerminut tunngavigaa KNI A/S-p pisortaanera Gerhardt Petersen avisimi Sermitsiami septembarip 22-ianni oqarsimammat, nunaqarfinni minnerusuni ingerlatsivinnik matooraaneq sulisullu ilaannik soraarsitsinissaq pinngitsoorneqarsinnaanngitsoq.

- Taamatut saqqummiussaqarneq ilumoornersoq Naalakkersuisut uppernarsartariaqarpaat, Ane Hansen allappoq, erseqqissaatigaalu KNI-p amigartooruteqarnera nunaqarfinni minnerusuni ingerlatsivinnik matooraanermik kinguneqassappat tamanna akuersaarneqarsinnaanngitsoq.

KNI-p amigartooruteqarnera partiip Naalakkersuisooqataasup kisimi apeqqusinngilaa.

Marie Fleischer Inatsisartuni ilaasortaq Demokraatineersoq avisimut Sermitsiamut aamma oqarpoq KNI-p amigartooruteqarsimanera akisussaasunut kinguneqartinneqartariaqartoq.

- Ingerlatseqatigiiffiup siulersuisui sassartariaqarput amigartoorutinullu akisussaasut inissillugit, Marie Fleischer Sermitsiami issuarneqarpoq.