IA Demokraatillu: Aleqa marloqiusamik pissuseqarpoq
Naalakkersuisunngorlaamut, taassuma allatsissaanut naalakkersoisoqarfianilu pisortassamut akissarsianut aningaasartuutit nutaat taavalu aamma naalakkersuisoqarfimmi aningaasartuutissat allat.
Naalakkersuisoqarfimmik nutaamik pilersitsissalluni akikitsuunngilaq. Naalakkersuisullu siuliisa qulingiluanik naalakkersuisoqarnerat, taamani akerliusunik assut isornartorsiorneqarpoq.
Taamaammat naalakkersuisut siulittaasuata, Aleqa Hammondip, naalakkersuisut ippassaq qulingiluanngortimmagit, Demokraatit Inuit Ataqatigiillu taanna marloqiusamik pissuseqarnerarpaat.
- Soorunami eqqarsarnartorujussuuvoq, assersuutigalugu Aleqa Hammondi illua tungiliuttuugallarmat ukiut sisamat atorpai uparuaqattaarlugu qulaaluanik naalakkersuisuuteqartugut. Taamaammat eqqumiippoq massakkut naammineq taamannak naalakkersuisumik ilaqqiimmat, Demokraatini siulittaasoq, Jens B. Frederiksen oqarpoq.
Taama isummerneq IA-mit isumaqatigineqarpoq.
- Isumaqarpunga naalakkersuisoqatigiit massakkut qulingiluanik naalakkersuisunngortitsinerat takutikkaa qanoq siusinnerusukkut naalakkersuisuunitta nalaani uparuartorsimasatik qanoq uniortigisimanersut. Taamanikkut naalakkersuisuusimasoq, Anthon Frederikseni taamatut naalakkersuisunngornerani asuli akissaajaataaginnartut taagorpaat, suliassaa allap tigusinnaagai oqalullutik. Taamaammat massakkut nassuerneq annertoorujussuaq taakkunanngaanniit tusarparput, nammineerlutik paasigamikku qanoq pisariaqartigisoq, IA-p gruppiani siulittaasoq Agathe Fountain oqarpoq.
Kisianni naak Naalakkersuisut amerlineqarneri Jens B. Frederiksenip marloqiusamik pissusilersornertut isigineraraluarlugu, pinngortitaq avatangiisillu immikkut naalakkersuisoqalertinneqarnerat nuannaarutigaa.
- Nul-tolerancimut tunngatillugu oqallinneq takutippaa qanoq annertutigisumik pisariaqartitsinersugut avatangiitsip illersornissaa pillugit. Sorpassuit siunissami suliassaasussaapput, taamaammat immikkut suliarineqarnissaa, immikkut naalakkersuisoqarfeqarnissaq uagut tapersersorparput, Demokraatini siulittasoq oqarpoq.
Maanna Naalakkersuisuusut illua tungiliuttuugallaramik oqaatiginikuusaanut Agathe Fountain aamma orulluteqaraluarluni, naalakkersuisoqarfiit amerlineqarneri pisariaqarsoraa.
- Pinngortitaq avatangiisillu massakkut pingaaruteqartorujussuupput, ingammik urannimik qummut killilerneqanngitsumik piiaanissaq eqqarsaatigalugu, tassani suliassaqarfik soorunami annertummat. Aamma allat aatsitassarsiornermi suliat eqqarsaatigalugit, avatangiisit innarlerneqannginnissaa aammalu avatangiisimut kingunissai pitsaasumik suliaqarnissaa soorunami tassani inissaminiippoq, Agathe Fountain oqarpoq.
