Høyvikimut nunarput ilaassanngilaq

Islandimiut savalimmiormiullu killilersugaanngitsumik niueqatigiinnerannut, Høyvikimut, Nunarput ilanngutissanngilaq. Tamanna nunat avannarliit killiit siunnersuisoqatigiivisa Islandimi ataatsimeeqatigiinneranni ippassaq naammassisumi inerniliunneqarpoq.

-Naalakkersuisut nunatsinni suliffeqarfinnut tusarniaasimapput, tassanilu erserpoq Nunarput niueqatigiinnermut tassunga ilaannakuugaluartumilluunniit ilanngunnissamut suli piareersimanngitsoq, nunanut allanut tunngasunut naalakkersuisoq Aleqa Hammond oqarpoq.

Killeqanngitsumik niueqatigiinneq pillugu tusarniaanermit inernerusut Aleqa Hamondip Islandimi ataatsimiinnermi saqqummiuppai.

Killeqanngitsumik niueqatigiinnermut ilanngunnermi missukutaanissaq nunatsinni ernummatigineqartoq Aleqa Hammond erseqqissaavoq.

- Nunarput Islandip Savalimmiullu suleqatigiiffiannut ilanngukkaluarluni sanngiinnersatut inissinnissaa ornigineqanngilaq, tassami nunatsinni ingerlatseqatigiiffeqarneq Islandimisulli aammalu Savalimmiunisulli suli nukittutigilersimanngilaq.

Taamaattumik Islandimiut Savalimmiormiullu killeqanngitsumik niueqatigiinnerminni misilittagassaat nunatsinni takoqqaarneqarumapput,

Aleqa Hammond oqarpoq.