Højskolit piginnaanngorsarfiunissaat isumaqatigineqartoq
- Taamatut isummerneq tunuartinngilarput, Sulisartut Højskoliata siulersuisuini siulittaasoq, Jess G. Berthelsen, oqarpoq. Pilersaarutit siulersuisunit oqaluuserineqaleruttormata, tamanna qanoq inerneqassanersoq oqaatigisinnaannginnerarpaa.
Assersuutigalugu Ilinniarnertuunngorniarfimmi imaluunniit inuussutissarsiutitaarniarluni ilinniarfinni ilinniartunngorsinnaasut pigineqarpata, ilinniarfiusinnaasullu naammanngitsut pigineqarpata, taava højskolit atorneqarsinnaanissaat pilersaarutaavoq. Kulturi, kinaassuseq inuttullu ineriartornissaq pingaarnerutillugit siornatigutut højskolimiissinnaaneq qimanneqanngilaq.
Pilersaarutit Knud Rasmussenip Højskolianit nangaanartoqartinneqarnerupput:
- Højskoli inuunerup atuarfiatut ingerlatiinnarusupparput. Taamaattorli pilersaarutinut ajattuinianngilagut, siulersuisuni siulittaasoq, Akaaraq Samuel Olsen, oqarpoq.
Højskolinut eqqarsaatit pillugit suliaqartussamik, suleqatigiissitamik Naalakkersuisut pilersitsereerput.
