Højskolinut aningaasaliissutit ikilineqarnissaat ernummatigaat
2009-mi aningaasat pillugit inatsimmi atuarneqarsinnaavoq, 2011-miit nunatsinni højskolinut marluusunut aningaasaliissutit 32,7 procentimik ikilisinniarneqartut. Aningaasaliissutit 11 millionit missaanniittartut, ukiormannalu 11,8 millioniusut, 2011-mi 8 millioninut appartinniarneqarput.
Sisimiuni Knud Rasmussenip Højskoliata pisortaa Jakob Møller Lyberth aamma Sulisartut Højskoliata pisortaa Kaj Lyberth partiinut allagaqarlutik aningaasaliissutit appartinneqarnissaat pinngitsoorniaqquaat.
Sulisartut Højskolianni siulersuisut siulittaasuat Jess G. Berthelsen ima oqarpoq:
- Massakkut aningaasaliissutaasartut naammaqqartarput. Inatsisartunilu ilaasortanngortussat ilisimasariaqarpaat, højskolinut aningaasaliissutaasartut ikilisinneqarpata, tamanna højskolit matunerannik kinguneqassammat, naluaralu tamanna siunertarineqarnersoq, Jess G. Berthelsen oqarpoq.
Knud Rasmussenip Højskoliani pisortap Jakob Møller Lyberthip oqaatigaa, højskolit inuiaqatigiit ineriartornerannut inuillu ataasiakkaat inerisimanerannut tunngaviusunillu ilisimasaqarnerinut pingaaruteqarluinnartut.
- Maani misissuilaaratta højskolertut maaneereeraangamik sumut ingerlaqqittarnerat paasiniarlugu. Paasivarput højskolertarneq iluaqutaasoq, arlallit ilinniagaqarusulertarput sapiissuseqalertarlutillu, arlallit aamma suliffeqalertarput tassami suliffimik paarsinissaq manna perorsaataallunilu ilinniarfiusarami. Højskolit siulersuisuisa partiit inatsisartunullu qineqqusaartut aningaasaliissutinik ilanngaasoqarnissaa pinaveersaartinniaqqullugu kaammattorpaat .
