Høgni Høydal Katuami oqalugiarpoq

Radio aviisimiit Høgni Høydal aperaarput Nunat avannarliit siunnersuisoqatigiivini Kalaallit Savalimmiormiullu qanoq suleqatigiissinnaanersut?

- Nunarsuarmi massakkut soqutigineqarnerpaavoq silaannaq, ilinniartitaaneq, ilisimatusarnerlu. Tassalu tamannarpiaavoq Savalimmiut Kalaallillu Nunaata massakkut iluaqutigiligaat. Taamaattumik isumaqarpunga universiteteqarnitsigut suleqatigiinnerusariaqartugut, Høgni Høydal oqarpoq.

Taanna isumaqarnerarpoq ilisimatusarfiit suli annerusumik ukkunnerusariaqartut, Nuummilu Ilimmarfik nutaarsuaq taakkartorlugu.

- Inuiaqatigiiarannguit ineriartortut taamaalillutik ilinniartunik ilinniartitsisunillu nunami allamiunik periarfissiisinnaalerput, taamaattumik isumaqarpunga ilinniartitaaneq ilisimatusarnerlu ukkunneqartussatut pingaarnerpaatut isigisariaqartoq. Taamaalilluni aamma inuusuttortagut naapissinnaalerniassammata, soorlu Savalimmiormiut Kalaallit Nunaani atuarlutik Kalaallillu Savalimmiuni Islandimilu aamma atuarlutik.

Høgni Høydal aperaarput, Savalimmiut isumaliutersuutaannut kalaallit soqutiginninnerat qanoq maluginiarsimaneraa.

- Suleqatigiinnerput ukiuni arlalinni Folketingi, Atlantikullu Avannaani Suleqatigiit kiisalu naalakkersuisut aqqutigalugit nukittorsarparput. Taamatuttaaq Savalimmiut Kalaallillu Nunaata suleqatigiinnissaannik ukioq kingulleq isumaqatigiissusiorpugut, taannalu massakkut immersorniarsaraarput, Høgni Høydal oqarpoq.

Taassumattaaq tikkuartorpaa aalisarnerup tungaatigut periarfissat ajunnginnerusut anguniarneqarnerusariaqarnerat.

- Savalimmiut Islandip Kalaallillu Nunaata akornanni aalisarnerup tungaatigut nunap pissarititai ikioqatigiissutigineqarnerusariaqarput atlantikullu avannaani niuernermik killersugaannginneq pisariaqarpoq soorlu kalaallit suliffeqarfiutaat Savalimmiuni aamma immikkoortortaqarlutik killormullu aamma Savalimmiormiut Islandimiullu suliffeqarfiutaat Kalaallit Nunaanni immikkoortortaqarlutik, taamaalilluta nunap pissarititaanut tunngatillugu attaveqarfigiissinnaassagaluarpugut, Høgni Høydal oqarpoq.

Suleqatigiinneq nukittorsarnerorusullugu Høgni Høydalip nunatsinni Nunanut allanut Naalakkersuisoq Aleqa Hammond Savalimmiunut aamma qaaqquniarpaa.