HS Analyse: Inuit Ataqatigiit ajugaassapput

Taamaakkaluartoq IA ajugaassamaarpallaassanngilaq, qinersisartummi 40 procentiisa qinersiartussanerlutik imaluunniit kikkut qinissanerlugit suli naluaat.

Isumasiuisitsinermi 32 procentit IA qinerpaat, takujuminaapporli Josef Motzfeldt imaluunniit Juliane Henningsen qinerneqarnerpaasoq, tamarmik tapersersorneqaqimmata. Isumasiuineq naapertorlugu Siumut 29 procentinik qinerneqarpoq, eqquutissappallu folketingimi ilaasortaatitaqaannassapput. Siumukkormiut akornanni Lars-Emil Johansen qinerneqarnerpaavoq, Doris Jakobsen Mininnguaq Kleistilu naligiiginnangajattut.

Demokraatit 23 procentinik qinerneqarput, taamaalillutik folketingimut isertitaqarnissaminnut 6 procentpointinik amigaateqarlutik. Demokraatini Palle Christiansen Jens B. Frederiksenilu qinerneqarnerpaapput. Atassummeersut 16 procentinik qinerneqarput ilimagineqaratillu folketingimut isertitaqarnissaat. Ellen Christoffersen atassummiit qinerneqarnerpaavoq.

Isumasiuisitsinermi inuit 813-it aperineqarput.

Danmarkimi isumasiuisitsinerit takutippaat talerperlit saamerliillu naligiittut, taamaalilluni Atlantikup Avannaani Suleqatigiit kiap ministeriuninngornissaanik aalajagiisussanngorsinnaapput.

Savalimmiuni Høgni Hoydalip qinigaaqqinnissaa ilimagineqarpoq, qinigaasussalli aappaa suminngaanniissanersoq suli nalunaraluartoq ilimagineqarpoq talerperliit isertitaqassasut. Høgni Hoydal ministeriunissatut piukkussaminik tikkuagaqanngilaq, namminerlu aalajagiisussanngussaguni demokratiip equngassuteqarneranik tamanna takutitsisuussasoq isumaqarluni.

Kingullermik Nunatsini Folketingimut qinersisoqarmat qinersisinnaasut 60 procentii inulaarlugit qinersiartorput.