Hoydal: Savalimmiut Kalaallit Nunaatalu isumaqatigiissutaat assigiipput
- Oqartariaqarpunga kalaallit Namminersorneq pillugu isumaqatigiissutaata anguniarnera Savalimmiuni pisumit allaanerujussuusoq, Høgni Hoydal aallartippoq.
- Uagut Namminersornerulernermut isumaqatigiissuterput 1948-meersuuvoq. Kingorna pisuussutit uumaatsut pillugit isumaqatigiissut, oqartussaaffinnik tigusinissamik taallugu isumaqatigiissut aamma nunanut allanut politikkeqarnermut isumaqatigiissut tigujartorsimavagut. Taakku akisussaaffigileriartorneranni isumaqatigiinngissuteqartarsimaqaagut, maannali oqarsinnaasoraanga kalaallit Namminersorneq pillugu isumaqatigiissutaannut uagut isumaqatigiissutigut naapertuupput. Allaassutigiinnarpaa kalaallit inatsisissamut isumaqatigiissutaat ataaserujussuummat, Savalimmiuni immikkoortukkaarlugit uagut isumaqatigiissuteqarsimasugut. Assersuutissaqqippoq pisuussutit uumaatsut pillugit 1992-imi danskinut isumaqatigiissuterput. Taannalu Kalaallit danskillu isumaqatigiissutaannut assingoqaaq, Høgni Hoydal nassuiaavoq.
Namminersornermut ikaarsaariarsimaneq savalimmiormiunut akisussaassuseqarnermik angisuumik tunisinerarpaa, oqarluni isumaginninnikkut, kulturimut tunngasutigut, inuussutissarsiutitigut aningaasaqarnikkullu assut ineriartortitsisimasoq.
- Politikkikkut ineriartorneq akisussaaffigigatsigu nunarsuarmioqataanerput aamma takutikkusussimavarput. Akisussaaffimmillu tigusineq Savalimmiut siuariartuutaasimavoq, oqarpoq.
Assersuutigai Savalimmiormiutut oqaatsit pingaarnerpaatut inissisimanerat, allaffissornerup inuiannut tulluarsagaasimanera, nammineq aningaasaqaneq allallu namminiilivikkiartornermut pingaaruteqarluinnartut.
- Isumaqarpunga savalimmiormiut ullumikkut tamavimmik ataatsimoorussillutik Savalimmiut namminiilivinnissaat suliniutigigaat. Pissutsit taamaattuaannarsimanngillat, isumaqatigiinngittarsimaqaagummi. Oqartussaaffiilli tiguneqaraangata kingorna akisussaaffigilikkatut allatulli iperarumasanngilagut, Høgni Høydal oqarpoq.
