Umiarsuit takornarianik ilaasoqarlutik angallassisut nunatsinnut tikittartut amerliartortillugit nunami hoteliutillit takornarinik unnuisartoqarnerat ulorianartorsinnaavoq, taamatut oqarpoq, nunatsinni takornaqarnermi inuussutissarsiornermilu siunnersuisoqatigiit siulitaasuat Stig Rømer Winther, ippassaq umiarsuaq takornarianik angallassisartoq nutaaq Fram Nuummut tikimmat nalliuttorsiornermi oqaloqatigineqarnerani.
Umiarsuit takornarianik angallassisartut tikittartartut amerliartortillugit, hotelini unnuisartut ikileriassapput, taamaattumillu nunami hotelinik sanaartortoqartariaqarpoq, pioreersulluunniit kusanarnerusunngortinneqarsinnaapput, Stig Rømer Winther oqarpoq. Timmisartortitseqatigiiffik Air Greenland Nunatsinnilu Takornariaqarnermi Inuussutissarsiornermilu Siunnersuisoqatigiit hotelit atorluarneqarsinaanissannik ukiamut iliuusissamik piareersaateqarput, nunami suliffissaqartitsilersinaasunik. Ukiut ikittunnguit qaangiuppata hotelit kusanarnerpaat luksushotelit piffissami qaninnermi sanaartorneqalernissaat takorloorpara, taakkualu nunarsuarmi tamarmi hoteliutilinnit aningaasalersorneqarsinnaapput, taakkualu nunatsinni sanaartornissaminnut soqutiginnittut saaffiginninnikuupput, periarfissanillu ujartuillutik, piumanngikkaluaruttaluunniit sanaartortoqarumaarpoq, Stig Rømer Winther Nunatsinni Takornariaqarnermik Inussutissarsiornermilu siunnersuisoqatigiit siulitaasuat oqarpoq.
Takornariaqarneq nunatsinni inuussutissarsiutit pingaarnerit ilagilissagaat qangali takorloorneqarpoq, tamannalu piviusunngoriartorpoq, ukiunilu makkunanni sulissutigineqarpoq, ukioq naallugu takornarianik sullissinernik ingerlataqalernissaq, hoteli 47-nik luksusiusunik, nunasuarmi kusanarnerpaat assinginik sanaartortoqarnerisigut, Stig Rømer Winther oqarpoq.
Umiarsuit takornarianik angallassisut 21-t juulip qaammataanniit septembarip tungaanut Nuummut tikittartussaapput.
