Hotel Icefjord nammineq immiaaraliortalissaaq
Ilulissani nammineq immiaaraliortalernissaq maanna piviusunngoraluttuarpoq. Taamatullu pilersaaruteqartuuvoq Hotel Icefjord, taama aviisi Sermitsiaq allaaserinnippoq.
Sermeq sermersuarmiit nakkaasimasoq aatsillugu immiaaraliarineqartassaaq.
Immiaaqqanillu immiorneq Hotelimi suliarineqartassalluni. Immiaaqqanik maqititsinermik misilittagalimmik Danmarkimeersumik immiaaraliornissap aallartisarnissaanut ikiuuttussamik Hotel Icefjord tikeraartoqaqqammersimavoq. Immiaararlu 800-miit 1200 liiteri tikillugu annertussusilik maqisinneqartarnissaa naatsorsuutigineqarpoq.
Hotel Icefjordip immiaaraq siulleq maqitassaa juunip 17-ianni maqiseqqaarneqassaaq, sulili immiaaqqap qanoq ateqartinneqarumaarnissaa aalajangiunneqanngilaq.
Nunatsinni illoqarfigisami immiaaraliortarneq siaruaakkiartorpoq, tassami Narsamiittoq Greenland Brewhouse sermersuarmeersumik sermimik aatsitsillutik aamma immiaaraliortarput kiisalu Nuummi Hotel Godthåb nammineq immiaaraliaminik tuniniaasarluni.
