Inuussutissarsiutit

Hotel Disko nutaamik pisortaqalersoq

Hotel Disko Island Topasimit nutaamik pisortassartaarpoq. Jens aamma Augusta Sallingip Hotel Disko maajimi tunigamikku Topas Travel piginnittunngorpoq. Pisortanngortoq akunnittarfiup siuarsarnissaanut piareersimavoq.
Assi © : Povl Abrahamsen/Flickr Creative Commons
Allattoq Merete Lindstrøm
septembarip 11-at 2018 07:30
Nutserisoq Connie Fontain

31-nik ukiulik Laura Bjerre Topasimi angalatitsinermi 2011-miilli pisortaasimavoq. Pisortanngortoq Kilimanjaromi 5895 meterisut qutsitsitigisumi ukiortaarsiorpoq nunatsinneeqqaramilu Arctic Circle Racemi peqataalluni. Nunatsinnilu nutaanik suliaqalernissaminut maanna qilanaarpoq.

- Qeqertaq alutorilluarpara illoqarfillu pissanganartuutillugu, takornarianik amerlanerusunik tikisitsisalernissara illoqarfimmiunillu amerlanerusunik peqataatitaqalernissara neriuutigaara, Laura Bjerre oqarpoq.

Akunnittarfiup pisortaa atorfimmut neqeroorummik akuersilluni aappanilu Qeqertarsuarmut nuussanerlutik ulluni marlunni isumaliutigeqqaartariaqarsimanerarpaa.

AAMMA ATUARUK Qeqertarsuarmi akunnittarfik allanit pigineqalersoq

Pisortanngortup akunnittarfiup nutaamik neriniartarfilerlugu iluarsartuunnissaa suliassaani siulliuvoq. Pisortanngortorlu illoqarfimmiunut tunniussaqarsinnaanissaminik neriuuteqarpoq.
 
- Illoqarfimmiut iluaqutigisinnaasaannik illoqarfiup qeqqani maani pilersitserusuppugut, soorlu illoqarfimmiut neriartorfigisinnaasaannik. Tamanna kissaataavoq, Laura Bjerre oqarpoq.

Qeqertarsuarmiut qeqertami angalatitsinernik akunnittarfimmilu sulinermik ingerlatsisuunissaat taassumattaaq kissaatigaa.

Pisortanngortoq angerlarsimaffittaamini inissilluarsimanerarpoq isumassarsiareriikkamilu ineriartortissinnaanissaanut qilanaarpoq.

- Eqqarsaaterpassuit ineriartortinneqarnissaanut piareersarpugut, taamaammat ukiup nikinnerata tullianut suna neqeroorutigilissanerlugu takussavarput, Laura Bjerre, Hotel Disko Islandimi pisortanngortoq oqarpoq.

Aamma atuaruk