Hotel Arcticip filmiliaa kuultinnappoq
Siullermik nunarsuaq tamakkerlugu takornarianut pilerisaarutinik filmilianik Berlinimi saqqummersitseqatigiinnermi, "Das Goldene Stadttor"-imi, nuannersumik tusagassaqarpoq. Tassanimi Ilulissani Hotel Arcticip filmiliaa "A world beyond imagination" kuultinnappoq.
- Inassutigineqarnerput tusaratsigu pissangaqaagut, kuultinnannerpullu tulluusimaarutigaarput, Kalaallit Nunaata pilerisaarutigineqarneranut taamaalilluta peqataasinnaanngorpugut, Hotel Arcticimi pisortaq, Erik Bjerregaard, sermitsiaq.ag-ip nittartagaani issuarneqarpoq.
Takornariaqarneq pillugu Hotel Arcticip filmiliaa internetsikkut youtube-imi aamma takuneqarsinnaavoq.