Hongkongip siuttuata USA akuliuttariaqannginneraraa
Akerliussutsiminnik takutitsisut, USA-p Hong Kongimi sinniisoqarfiata silataani katersuutereersullu Lam USA-mut taama kaammattuuteqarpoq.
Tamat oqartussaaqataanerat aqqani ikiorneqarnissartik akerliussutsiminnik takutitsisut USA-mit noqqaassutigaat.
USA-mi kongressip inatsisissatut siunnersuutitigut akerliussutsimik takutitsisut pisortatigoortumik tapersersuinissaat akerliussutsiminnik takutitsisut kaammattuutigaat.
Hong Kongilli USA-mik niueqateqarnera taamaalinikkut innarlerneqarsinnaasoq Carrie Lam oqarpoq:
- Nunat allat Hong Kongimi pissutsinut akuliuttariaqanngillat, Carrie Lam oqarpoq.
Inuttut pisinnaatitaaffiit ataqqineqarnersut, tamallu oqartussaaqataanerat illersorneqarnersoq, USA-p inatsisissatut siunnersuutitigut ukiut tamaasa nakkutiginnittalersinnaanissani piumasariniarpaa.
AAMMA ATUARUK Demonstranter i Hongkong beder USA om hjælp
Inuttut pisinnaatitaaffiit, tamallu oqartussaaqataanerat sanngiillisinneqarpata, USA-p assersuutigalugu Hong Kongimik niueqateqarnera innarlerneqarpat Kina assigiinngitsutigut pillarniarpaa, USA-mi Hong Kongimik niueqateqarnermini isumaqatigiissuteqarmat.
Inatsisissatut siunnersuut, republikanerinit Chris Smithimit Marco Rubiomiillu, kongressimi 2017-imi saqqummiunneqarpoq, kongressimilu ilaasortat amerlanerussuteqarluartut siunnersuut tapersersorpaat.
Hong Kong namminersortuuvoq, 1997-imili Kinamut ilaalerluni. Innuttaasut pinerluuteqarsimasutut pasineqartut Kinami eqqartuunneqarnissamut tunniunneqarsinnaanissaat pillugu isumaqatigiissut atuutilermalli akerliussutsiminnik takutitsisut qaammatini kingullerni imaaginnavissimapput.
Hong Kongimi Kinamilu aaqqiagiinngissutit torersumik aaqqiivigineqarnissaat Donald Trumpip siusinnerusukkut kaammattuutigereerpaa, pissutsillu Kinap nammineq aaqqivigissagai oqaatigalugu.