Nunaminnik pingaartitsisuinnarnik aqutsisoqalersaarneq Hongkongip aqutsisuata tapersersoraa
![](/sites/default/files/styles/image_934x467/public/article_images/20210305-064521-l-1920x1280we.jpg?itok=jZwP6A18)
Nunaminnik pingaartitsilluinnartuinnaat Hongkong aqussinnaasariaqarpaat. Tamanna isumassarsiatsialaasoq, Hongkongip naalakkersuinikkut siuttua Carrie Lam oqarpoq.
Kinami oqartussat pilersaarutaat pisariaqarluinnartoq, taanna oqarpoq, Hongkongimilu illuatungiliuttunik malersuiniarnertut taaneqarnera ilumuunnginnerarlugu. Hongkong Kinami illoqarfik namminersortutut inissisimavoq.
- Piffissaq eqqorlugu aalajangiisoqarpoq, inatsisitigut tunngavissaqarpoq nunallu tunngaviusumik inatsisaa malinneqarluni, Carrie Lam Kinamik tapersersuerpalaarluni oqarpoq.
AAMMA ATUARUK Hong kongimi tamat oqartussaaqataanerannik tapersersuisut tigusaasut
Kinami naalakkersuisut siunnersuutaat sapaatit-akunnerata siuliani saqqummiunneqarpoq. Hongkongimi qinerseriaatsip allanngortinnissaa siunnersuutaavoq, nunaminnik pingaartitsisuinnaat qinigassanngortinneqarsinnaanissaat aqutsisinnaanissaallu anguniarneqarluni.
Nunaminnik pingaartitsisuinnaat qinigassanngortinneqarsinnaanissaannut siunnersuut, Hongkongip namminersornerunerata siunnersuutitigut innarlerneqarneranik kinguneqassasoq, isornartorsiuisut oqaatigaat.
Tamat oqartussaaqataanerannik sukataarutiginnittuni sinneruttut unitsinneqassasut Kinamillu tapersersuisut kiserngorutissasut, isornartorsiuisut oqarput. Nutaarsiassaqartitsivik Ritzau taama allappoq.