Hondurasip præsidentia soraarsitaavoq
Præsidentip sakkutuut timmisartotartut naalagaat sapaatit akunneranni kingullermi soraarsippaa, præsidentip ukiuni sisamani suli ataannarsinaanngorlugu pisortatigoortuunngitsumik innuttaasunik taasisitsinissamut sakkutuut tapersersuinngimmata. Zelayap aamma nunami sakkutuut naalagaat ajoqutigisani soraarsereerpaa.
Hondurasimi, 1980-ikkunnili naalakkersuinikkut patajaatsuuusimagaluartumi, præsidentip tunngaviusuimik inatsimmik allanngortitseriaraluarnera avissaartuutsitsilerpoq. Nunami eqqartuussiviit qullersaasa Zelayap iliuuseriniagaa qanittukkut itigartippaa, sakkutuullu naalagaata sulileqqinnissaa piumasaralugu. Præsidentip tamanna itigeratippaa, oqarluni taamaaliornissaq uppisitsinertut isigineqartariaqartoq.
Tassalu sakkutuut ullumi uppisitsipput. Zelaya præsidentitut illorsuarminit aallarunneqareersoq, Costa Ricap isumannaallisaanermut ministeria CNN-mut oqarpoq, Zelaya timisartorluni Costa Ricaliarsimasoq, tasanilu qimaasutut pineqarumalluni qinnuteqarluni.
Piffissami tassanerpiaq Hondurassimi sakkutuut Zelayamik illersuisuinut, illoqarfiit pingaarnersaanni akerliussutsimik takutitsisunut, qulliliornartumik eqqaassilerput.
Sakkutuut uppisitsinera Nunarsuarmi akerlerineqarpoq. Pisut akuerineqarsinnaannginnerarlugit EU-mi nunanut allanut tunngasunut ministerit oqartut. USA-p præsidentiata, Barack Obamap, Hondurasimi pissutsit isumakulunnarnerarpai.
