Hollywoodip allagartarsua peerneqariaannaavoq

Ingerlatseqatigiiffissuup namminersortup nuna allagartarsuup inissisimaffia pigaa, maannalu tamaani illuliortoqarnialerluni.

Parisimiippoq Eiffeltårn, Londonimiilluni Big Ben Los Angelesilu allagartarsuaqarluni Hollywoodimik, suli piffissami sivikitsumi atagallartussamik. Nuna allagartarsuup inissisimaffia pisiarissallugu namminersortut aningaasanik naammattunik katersisimanersut ullumi paasinarsissaaq, tassami ingerlatseqatigiiffiup namminersortup nuna tamanna pigimmagu.

Ingerlatseqatigiiffiup maanna Los Angelesimi illoqarfimmik aqutsisunit 68 mio. kr.-it piumasarai. Illoqarfimmik aqutsisut nuna tamanna pisiarissanngippassuk, ingerlatseqatigiiffik tamaani sanaartorluni aallartissaaq, Los Angelesimi najugallit nuannarinngeqisaannik.

- Illumi allagartarsuarmut isikkivilimmi najugaqarpunga illoqarfiullu ilisarnaatituaa peerneqassappat uggornassaqaaq, taama oqarpoq Margareth Strick.

Nuna tamanna illoqarfimmik aqutsisut pisiarissanngippassuk tamatuma qanoq iluaqutiginiarnissaanut isumassarsiat amerlaqisut takkussorput. Qallunaap illussanik titartaasartup Christian Bay Jørgensenip allagartarsuaq hotelimi inuulluataarfiusartumi allagartaliunneqassasoq siunnersuutigaa, isumassarsiaali nuannarineqarpallaanngilaq.

- Hollywoodip allagartarsuata nalaani hoteli atorfissaqartinngilarput, taama oqarpoq illoqarfimmik aqutsisunut ilaasortaq Tom Labunch.

Naqinnersuit qaqortut 1923-imi napparneqarput nunamik tuniniaanermut pilerisaarutissatut. 2002-mi ingerlatseqatigiiffiup namminersortunit aningaasalersorneqartup nuna 22 mio. kr.-ilerlugu pisiaraa. Siullermik taakkua 120 mio.-ilerlugu tuniniaraluarpaat, maannali tassa akia affaannangajanngorsimalluni.