Holdit sisamat anngunniunnissamut piareerput

Siulliullutik unammissapput G-44 Qeqertarsuarmeersut aamma SAK Sisimiuneersut, pissartanngorniutivinnissamullu anngunniullutik unammisussat aappaat tassaallutik Malamuk Uummannameersut aamma Eqaluk-54 Kujataani nunaqarfimmit Tasiusameersut.
aggustip 13-at 2009 07:07

Unammisaqattaarnerit ippassaq ingerlanneqareersullu tamanna paasinarsivoq. Tassami G-44 Eqaluk-54-imut 4-0-imik ajugaanermikkut gruppe 1-imi ajugaasuummata. Taamaattorli Eqaluk-54 ajorsaraluarluni pissartanngorniutivilluni unamminissamut anngunniuteqataasussanngorpoq.

Gruppemi tassani unamminerup aappaani Nallunnguaq-48 ATA-mut Tasiilameersumut 9-0-imik ajugaavoq, taamaalilluni Nallunnguaq-48 aamma Eqaluk-54 pointitigut amerlaqatigiilerput.

Kisianni Nallunnguaq-48 Eqaluk-54-imut ippassaani ajorsareernermikkut ajugaarujussuarnertik iluaqutigisinnaanngilaat, tassami pointitigut naligiittoqartillugu unamminerup inernera aalajangiisuusarmat.

Gruppet aappaanni Nûk Nuummeersoq aamma SAK Sisimiuneersoq unammipput. Unammineq naligiiffiusumik 2-2-mik inerneqarpoq, taamaattorli SAK pissartanngorniutivilluni unamminissamut anngunniulluni unamminissamut peqataasussanngorpoq, unammisaqattaarnerni isertitaqarnerunini pissutigalugu.

Malamuk Uummannameersoq KB-84-imut Kangaatsiameersumut ippassaq 1-0-imik ajugaanermikkut Gruppet aappaanni siuttunngorput.

Arsaattartut ullumikkut qasuersaartinneqarput. Aqaguli tassa semifinalit ingerlanneqassapput G-44-p SAK unammissallugu aamma Malamuup Eqaluk-54 unammissavaa. Taakkunanilu ajugaasut pissartanngorniutivinnissamut anngutissapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq