Libanon-imi peqatigiit Hizbollah-kkut pissaaneqarnerpaanngulerunarput.
Hassula tassaavoq Shiamuslimit ullortut illernartutut isigisaat. Ullorlu taanna nalliukkaangat ukiut 1300-t matuma siornagut Imam Huseiniugaluup toqunera aliasuffittut nalliussiniarneqartarpoq.
Ullormilu tassani aamma Libanonimiut akornanni Hizbollah-p pissaaneqassusersua nalliussiniarneqartarpoq. Inuppassuit millionit sinnillit qernertuinnarnik atikkersorsimallutik katersuupput, aattalimmillu iperartuisoqarluni.
Tamanna aallartippoq 1982-mi Israelimiut Libanon-i tiguarmassuk illoqarfimmullu Beirutimut isaanerminni politikkikkut pikititsivigilermassuk.
Taamani inuit ikittunnguit Arabiami tamani sorsuttartoqatigiittut peqatigiiffiliorlutik aallartipput. Taamaaliornermikkullu iluatsilluarput tassami kristumiuussuseq atorlugu taamanili siamusliminik aqutsileramik.
Maannali Israelimiut tunuartilerput Hizbollah-kkormiunilli malersorneqartuarlutik. 1985-imili ulloq manna tikillugu tamanna kamassutigineqartuarpoq, Israelillu avannarpasissortaani ukiorpassuarni sorsuuttuarlutik.
Sorsuuttuarnermili Israelimiut ajorsartuaramik maanna tassa tunniutiinnarput.
Maannalu tassa neriuutigineqalerpoq, Hizbollah-kkormiut peqatigiiffittut inissisimajunnaarlutik Libanon-imi politikkikkut partiinngornissaat, taamaalilluni Arabiami inuit tamat oqartussaalernerat anguneqarsinnaalerniassammat.
Libanon-illi nunaata ilaani Israelimiut suli aqutsisuutinneqarput, taamaattumillu Hizbollah-kkormiut oqarput suli Israelimiunit aqutsisoqartillugu sorsunneq ingerlajuassasoq.