HIV-mut ullorititaq malunnartinniarlugu ingerlaaqatigiit soqutigineqanngillat
- Naamerluinnaq ataasinnguarluunniit anillanngilaq! Minutsit 15-it missaanni erinarsorfigigaluarpagut, naggataatigullu minutti ataaseq nipaallisimalluta, naamerluinnaq alakkartoqanngilaq, Per Thomsen Kalaallit Nunaanni Niuernermik ilinniarfinni ataqatigiissaarisoq oqarpoq.
Nunatsinni AIDS HIV-lu ajornartorsiutaanerat nittarterniarlugu aaqqissuussaq ingerlanneqarpoq.
- Ajoraluartumik kalaallit Nunaanni inoqarpoq HIV-mik AIDS-millu tunillatsissimasunik, tamannalu eqqartussallugu suli paqumigineqarpallaarpoq, taamaammat nunarsuaq tamakkerlugu ullorititamut atatillugu sammivarput.
Atuartullu ullaap tungaa atorpaat assigiinngitsunik sammisaqarlutik, ilai isiginnaartitsissusiortut, taalliortut, paasissutissanillu HIV AIDS-lu pillugit paatsoorluinnarneqarsimasunik, qanorlu tunillatsittoqarsinnaaneranik paasissutissanik nassuiaasiorlutik.
Malunnartitsinerlu naggaserlugu Namminersornerullutik Oqartussanut erinarsuataajutaa ingerlaaqatigiippugut, tamatta AIDS akiorniarlugu ilisarnaammik qalersarsualisaarluta.”
Per Thomsen Kalaallit Nunaanni Niuernermik ilinniarfinni ataqatigiissaarisoq oqarpoq.
Nunatsinni peqqinnissaqarfinnik nakkutilliisuunerup Flemming Stenzip paasissutissaatai naapertorlugit ukioq 2008 nunatsinni inuk ataaseq HIV-mik tunillatsissimasutut nalunaarsorneqarsimavoq.
