HIV-mik tunillaassuisoqarneranik tusatsiagaq eqqortuunnginnerarneqarpoq
- HIV-mik napparsimasut allannguuteqanngillat Sisimiunilu HIV-qartunik nutaanik paasisaqartoqarani, Peqqissutsimut Naalakkersuisoqarfimmi pisortaq Ann Birkekær Kjeldsen oqarpoq.
Innuttaasut tusatsiakkamik eqqortuunngitsumik siammarteriunnaaqqullugit peqqinnissaqarfimmit kaammattorneqarput. Aamma suliaq naalakkersuisoqarfimmit ilungersunartorujussuartut isigineqartoq, Ann Birkekær Kjeldsenip oqaatigaa.
- Tamatumunnga peqatigitillugu periarfissaasoraarput erseqqissaatigissallugu atoqateqarnermi imminut illersornissaq qanoq pingaaruteqartiginersoq. Paarisa peqqinnissaqarfillu usuup puuinik taakkuninngalu atuinermik ilisimasaqarnerulersitsiniarlutik nukippassuarnik atuisarput, tassami usuup puua kinguaassiuutitigut nappaatinut kissaatiginngisamillu naartulernissamut illersuutaalluarmat, Ann Birkekær Kjeldsen naggasiivoq.
