HIV-eertut ikiliartorput
Inuit HIV-mik AIDS-imillu nappaatillit ikiliartorput, AIDS-imilli nappaalasoqarunnaarnissaa imaaliallaannaq pinavianngilaq. AIDS pillugu Naalagaaffiit Peqatigiit nalunaarutaanni saqqummiunneqaqqammersumi taama inerniliisoqarpoq.
Allattoq Mads Lynge
juulip 30-at 2008 17:11
AIDS pillugu nalunaarusiaq ukioq allortarlugu saqqummiunneqartarpoq.
Pitsaaliuinermik suliap kingunerisaanik nunani assigiinngitsuni HIV-mik nappaatillit ikileriarsinnaasimasoq nalunaarusiami aamma atuarneqarsinnaavoq.
Nunat HIV-eeqarfiunerpaasut ilaanni tamanna takuneqarsinnaavoq, tassa Afrikami nunat HIV-mik eqqorneqarpaat ilaanni, sorlu Etiopiami, Ugandami Zambiamilu HIV-eertut ikileriarsimammata.
Afrikap kujasinnerusortaani HIV-eertut nunarsuarmi amerlanerpaajupput, nunarsuarmi HIV-eertut 67 procentii Afrikap kujasinnerusortaaninngaanneersuugamik.
HIV-mik tunillatsittut nunani allani aamma amerliartorsimapput.
Tassa Kinami, Ruslandimi, Tysklandimi, Tuluit Nunaanni aamma Australiami HIV-mik tunillatsittut amerleriarsimammata.
