Hitlerip atiia nungutaalerpoq

Hitlerimut atsiunneqarsimasoq, sullineq sikannertooq tappiitsoq, nynazistinit piumaneqangaarmat, nungutaanissaa ilimagineqalerpoq. Taama Tv-eeqarfik National Geographic Tyskland-ip immikkoortortaqarfianeersoq oqaluttuarpoq.

Sullineq sikannertooq taaguuteqartoq, Anophtalmus hitleri, isumaqarpoq Hitleri iseqanngitsoq, taannalu Sloveniami pulattaqqaviit iluanni uumasuuvoq. Sullinerlu taanna piumaneqangaarami, sullinernik katersisartut soqutigivallaarneq ajorpaat, uumanersoq toqunganersorluunniit. Sullineq sikannertooq Hitlerimut atsiunneqarsimasoq, ataasiinnaq pisiaralugu 7000 koruuninik akeqarsinnaasarpoq.

Tyskland-imi uumasunik katersugaasivimmi sullinerit taakkua amerlasuunngorlugit aamma pigineqarsimagaluarput, tilligarneqarsimappulli.

- Sullinerit taakkua piumaneqarluartuupput, uumaffigisartagaallu nungusarneqarlutik katersorneqartarlutik. Maani pigisagut tillinneqartaramik ikittuinnanngorsimapput, Martin Bähr, Katersugaasivimmi entomologi oqaluttuarpoq.