Himalayap ilaani aputip sisoornerani inuit 19-it ajunaartut

Toqungasut timaat 19-it aputip sisooreernerani nassaarineqarput, inuillu qulit maqaasineqarlutik. Inuillu oqartussanit annaanneqartut maannamut 32-upput.
Indiap avannarpasissuani nunap immikkoortuani Uttarakhandimi qaqqap Draupadi ka Danda II-p qanittuani aput sisoorpoq. Assi © : Ashish Gupta/flickr
Allattoq Ritzau
oktobarip 07-at 2022 09:25

Indiap avannaani qaqqarsuarni Himalayami qaqqat ilaanni aput sisoormat, inuit 19-init ikinnerunngitsut ajunaarput.

Tamaani oqartussat tallimanngornermi taama ilisimatitsipput.

Aput marlunngormat sisoorpoq, silalu atoruminarpallaanngikkaluartoq annaassiniarneq ullut sisamassaanik ingerlavoq, inuimmi qulit aamma maqaasineqarmata.

AAMMA ATUARUK Indiami inuit 150-it sermip nakkaanneratigut ajunaarsimasinnaasut

Qaqqasiornermik ilitsersuisut qaqqasiortunngorniallu aputip marlunngormat sisoorneranit eqqorneqarput.

Qaqqasiornermik ilitsersuisut annaassiniaqataanerat inuit maannamut 32-t annaanneqarnerannut pissutaaqataalluinnartoq, Sunil Lalwanip, qaqqasiornermik misilittagaqarpallaanngitsup oqaatigaa.

- Qaqqasiornermik ilitsersuisut peqatigalugit qaqqap qaavanut 50-100 meteriinnanngortoq aput sisuulerpoq. Ilitsersuisut peqqutaallutik suli uumavugut, taanna oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq