Hillary nunanut allanut ministeringussava?

CBS-imi tusagassiortup ippassaq apeqqutigaa, amerikami tusagassiortut tamarmik apeqqutigeqattaagaat, tassa; nunanut allanut ministeritut atorfik Hillary Clintonimut neqeroorutigineqarsimava? Taamaassimappallu Clintonip atorfik perusuppaa? Kiisalu Hillary Clintonip uiata præsidentiusimasup, Bill Clintonip suliniutigisarpassuinut attuumassuteqartut, nuliata ministerinngoraluaruni akisussaaffigiligassaanut ajoqutaasinnaassappat. Sapaatip akunerata kingulliup ingerlanerani Obamap isumaqatigiinniartitaasa Bill Clintonip suliniutigisaminut atatillugit soqutigisai qulaajarsimavaat, ilatigullu kisermaassillutik naalagaaffinnik naalakkersuisuutitaqartut suliniutigisaasa ilaannut aningaasaleeqataasartut paasisimallugit. Bill Clintonili oqarpoq suliniutimi ilai unitsinniarlugit, nuliali oqaaseqarusunngikkallarpoq, tallimanngormallu oqaaserisani attatiinnarnerarlugit. Hillary Clinton tallimanngormat oqaropoq, Obamap naalakersuisunngortitassaminik toqqaaniarneranut akuliukkusunnani, suleriaasaalu ataqqiniarlugu. Amerikamiulli tusagassiuutaasa tusatsiagaat naapertorlugit Hillary Clinton ministeringoriaannaalersoq - soorunami piumasaqaatigineqartut akuerisinnaassaguniginigit.