Hillary Clinton tunniutiinnalerunarpoq
Pisortatigut suli nalunaarutigineqanngikkaluartoq, qineqqusaarnermiit tunuaannalernera Clintonip oqaaseqartartuata assortunngilaa. Qinerseqqaarnerit tamarmik naammassilerneranni, Barack Obama sinniisussanit qinersisussanit amerlanerujussuarnit tapersersorneqartoq Clintonip kiisami nassuerutigilinnguatsiarpaa. Clintonip qineqqusaarnermini ikiortaasa arlallit sapaatip akunnerini tulliuttuni taamaateralersut paasineqarnerisa kingorna tamanna ilimanarsilluinarpoq. Clintonip, aningaasaliisartuni allatullu tapersersortini unnugu New Yorkimi angerlarsimaffimminnut qutsaviginiarunarlugit qaaqquai.
Barack Obama taperserteqaraluaqaluni suli mianersorallarpoq, sinniisunilli pingaarnertut taaneqarsinnaasunit amerlanerusunit tapersersorneqaleruni Clintonip ajugaaffiginissaa suli ilimanarnerulissagaluarpoq, qanorluunniilli pisoqaraluarpat Demokratit aggustimi ataatsimeersuarneranni aatsaat tamanna naqissuserneqarpat qulakkiivittussavaa. Barack Obamalli tapersersortai Hillary Clintonimik tapersersuileriataarnissaat ilimagineqanngingajavippoq.
Tamakkuli tamarmik oqaatigineqareerpata aamma imaassinnaavoq Clintonip siunissami, præsidentimut qinersisoqareerpat qanoq atorfinissinnaanini partiillu iluani qanoq sunniuteqartigilersinnaanini qulakkeerniarlugit tunniutiinnarnini suli oqaatigerusunngikkallaraa. Clintonip nammineq politikkikkut anguniakkamisut sulissutigisimasani Obamamut suliniutigitinnialersinnaavai, Obamallu præsidentinngussagaluaruni allaffissornikkut ingerlatsilernissaanut sunniuteqarsinnaanissani qulakkeerniarsinnaallugu.
Barack Obama præsidentinngussagaluaruni præsidentip tullersortaatut nammineq inissisimalernissaminut piareeqqaalluni, Hillary Clintonip politikerit New Yorkimeersut ilisimatissimagai, nutaarsiassaqartitsiviup AP-p nalunaaqutaq arfininngulersoq nalunaarutigaa.
