Hillary Clinton Nunatsinnukarusuppoq
Ataatsimeersuariaqqusisoq Per Berthelsenip naapisimaarpaa, tassaasoq Amerikamiut nunanut allanut ministeriat Hillary Clinton.
- Arnaavoq qanilaartoq oqaloqatigalugulu alutornarluinnartoq. Qallunaat nunanut allanut ministeriata Per Stig Møllerip oqarfigisimavaa Nunatsinnut tikeraarsinnaanissani eqqarsaatigeqqullugu. Oqaatigaalu nammineq inuttut Kalaallit Nunaat tikeraarusuttorujussuullugu, Per Berthelsen radioaviisimut oqarpoq.
Sikuiuitsoq Kujalleq pillugu isumaqatigiissutip ukiunik 50-inngortorsiorneqarnera, ataatsimiinnermi Per Berthelsenip peqataaffigisaani, malunnartinniarneqarpoq. Ataatsimiinnermilu sammineqartoq tassaavoq, Issittumi “ukiuni 50-ini eqqissineq ilisimatusarnerlu”.
Ataatsimiinnermi ilaatigut oqaluuserineqarput, avatangiisinik illersuineq aamma silap pissusaanut atatillugu nunat issittumiittut nunarsuup sinneranut pingaarutaat.
