Hilary Clinton ajorsalerunarpoq

Hillary Clinton imaassinnaavoq unnugu tunniutiinnarluni nalunaaruteqartoq. Ippassarmi arlalitsigut erserpoq præsidentimut qineqqusaarnerata killissaa soorluuna qanillattortoq, taama aviisi Berlingske Tidende allaaserinnippoq.
Allattoq Louise M. Kleemann
juunip 03-at 2008 07:51

Taama pasitsaassinermut annerpaamik ersersitsisuuvoq uia Bill Clinton ippassaq oqariataarmat taamatut ittumik qineqqusaartoqarnerani peqataanini imaassinnaasoq ippassaq naggataartoq.

Taamatuttaaq Hillary Clintonip qineqqusaarnermini suleqatini ippassaq unnukkut aggersarsimavai. Suleqataasullu nalunaarfigai pappiaraatitik nassarlugit aggissasut naatsorsuutit naammassineqarniassammata.

Clintonip suleqataat arlallit aamma isumaqarput Hillary Clinton tunurnerminik nalunaaruteqassaguni unammillertigisami Barack Obamap taasisinnaasut 2.118-usut aatsaat angoreerpagit ullumi aqaguluunniit aatsaat nalunaaruteqarsinnaassasoq.

Isumaliutigineqartunut aamma ilaavoq Barack Obamap Hillary Clinton tullersortissamisut neqeroorfigerataannaagaa. Nutaarsiassaqartitsiviullu CNN-ip tusarliussai naapertorlugit Hillary Clinton taama neqeroorfigineqariataassaguni soqutiginnittutut oqaatigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq