Hiisti qasuersaartoq

Ippassaq ullaaralaakkut bankimut aningaasanik aallertarfimmut aallertut ilaat tupaallatsinneqarpoq, aningaasanik tigusiviusartup nalaani hiisti takuleramiuk uninngasoq.

Hiistip piginnittaa Wolfgang H, saninnguani sinippoq, taannalu unnuaammat Wiesenburg-imi Berlinip eqqaaniittumi imerniartarfiit ilaanni immiaarartungaatsiarsimavoq. Qasuleriaramilu aningaasanik tigusisarfiup kissalaartinneqartartup iluanut qasuersaarniarluni sinilersimavoq. Taama Yahoo allaaserisaqarpoq.

Imerpallaarsimariarami hiistimi pitunnissaa sapilersimavaa, taamaalillunilu hiisti Sammy-mik atilik, bankimi aningaasanik tigusisarfimmut eqqutiinnarsimavaa.

Bankimut aallertoq tupassimaqisoq, politiinut sianersimavoq, taamaasillunilu hiisti piginnittaalu politiinit angerlaqquneqarsimapput. Hiistimik piginnittup akiliisitaanissani naatsorsuutigisinnaagaa, aammalu aningaasanik aallertarfiup iluata salinneqarneranik piginnittoq akiliisitaassasoq, bankip pisortsa oqarpoq.