Heunicke spiralilersuisimaneq pillugu oqaloqateqariartorluni nunatsinnut ullumi tikissasoq
Danmarkimi peqqinnissamut ministereqarfik taama paasissutissiivoq.
Magnus Heunickep Mimi Karlsenillu naartunaveersaatinik spiralilersuisimanerup qulaajaarneqarnissaanut ingerlariaqqinnissaq isumaqatigiissutigisussaavaat.
Spiralilersuisimaneq ilungersunartorujussuartut isigaara, ataatsimoorluta oqaluttuarisaanitsinni pisoq alinartuuvoq, Magnus Heunicke oqarpoq.
Arlaannaannulluunniit attuumassuteqanngitsut qulaajaallutik aallartittut junimi nalunaarutigineqarpoq.
AAMMA ATUARUK Danmark nunarpullu piareertut: Qulaajaasoqalerpoq
Tassani pineqarput nunatsinni niviarsiaqqat arnallu 1966-miit 1975 tungaanut naartunaveersaammik spiralilersorneqarnerat.
Kalaallit arnartai niviarsiaqqallu ilai 13-nik ukiullit 4500 -it akuersiteqqaarnagit ilisimatinnagilluunniit naartunaveesaammik spiralilersorneqarput.
Tusarnaagassiaq Spiralkampagnen
- Danskit oqartussaasui kalaallit amerliartoqqunagit spiralilersuinissaminnut inassuteqarsimasut, DR-ip podcastimik tusarnaagassiliareqqammisaani erserpoq.
- 1966-ip 1975-illu akornanni kalaallit niviarsiaqqat tuusintilikkaat spiralilersinneqarput.
- 1966-ip 1970-illu akornanni spiralilersinneqartut 4.500-upput.
- Kalaallit Nunaanni arnat naartusinnaasut taamani 9000-upput.
- Aperineqaqqaaratik spiralilersinneqarsimasuni arlallit tarnikkut timikkullu kingunerlutsitserujussuarnerannik kinguneqartumik qinigassinneqarsimanngitsutut misigisimapput. Anniaatigalugulu kingunerluutigisimagaat arlallit oqarput.
- Niviarsiaqqanut ukiukitsunut, angajoqqaavi akuersiteqqaarnagit, spiralilersuineq danskit suliniuteqaleruttorneranni inatsisitigut akuerisaanngilaq. Taamaammat nakorsat naartunaveersaatinik niviarsiaqqanut 18-iliineqanngitsunut, angajoqqaavi akuersiteqqaarnagit, siunnersuisinnaalersillugit inatsit allanngortinneqarpoq. Tamanna nakorsat niviarsiaqqanut ukiukitsunut, angajoqqaavi akuersiteqqaarnagit, spiralileeqqusaanertut paasisimavaat. Tassa imaappoq, nakorsat inatsisinik unioqqutitsisimapput.
- "Spiralkampagnen" P1-ikkut maajip ulluisa arfineq-pingajuanniit tusarnaarneqarsinnaalissaaq.
Tusarfik: DR-podcast "Spiralkampagnen"
Magnus Heunickep arnat spiralilertissimasut oqaloqatigissavai, peqqinnissaqarfimmilu immikkoortortaqarfiit aamma napparsimmavissuaq Dronning Indrids Hospital pulaassavai.
Danskit peqqinnissamut ministeriata nunatsinnilu peqqissutsimut naalakkersuisup nunatsinni peqqinnissaqarfimmi unammillernartut oqaloqatigiissutigissavaat, soorluttaaq Heunicke nunaqarfinnut aamma angalassasoq Danmarkimi peqqissutsimut ministereqarfik taama paasissutissiivoq.
Danskit peqqissutsimut ministeriat Magnus Heunicke arfininngornerup tungaanut nunatsinni tikeraassaaq.
