Hermann Berthelsenip Sulisitsisut Peqatigiiffiat isumaqatigilluinnarpaa

Namminersornerullutik Oqartussat Alcoamut piginneqataaleqqunagit Kalaallit Nunaanni Sulisitsisut Peqatigiiffiata, GA-p, Naalakkersuisunut ammasunik allagaqarluni – maanna kajumissaarutigaa. -Isumaliutersuut taama aningaasartaqartigisoq aningaasaliisartunit pikkorilluinnartunit, Kalaallit Nunaata karsianiunngitsoq, akisussaaffigineqartariaqarpoq. -Taarsiullugu imaaliortariaqarpoq, erngup nukinga atorlugu nukissiorfiliornissaq aatsitsiviliornissarlu Alcoa-p aningaasaliiffigeriarlugit Namminersornerullutik Oqartussanut kingorna akiliisassaaq, Sulisitsisut Peqatigiiffianni pisortaq, Henrik Leth, oqarpoq. -Taava innuttaasut nalussanngilaat suna naatsorsuutigisinnaallugu, Kalaallit Nunaatalu akiitsoqalernissaa Naalakkersuisut pinngitsoortissavaat, Henrik Leth oqarpoq, ilanngullugulu oqarluni, suliassat allat aallartitassat naammattut. Sisimiut borgmesteriat, Hermann Berthelsen, aperaarput, Sulisitsisut Peqatigiiffiata kajumissaarutaanut qanoq isumaqarfigineraa:
apriilip 06-at 2008 17:31

-Ilumoortortaqarluinnaqqissaarpoq, Kalaallit Nunaannummi aningaasaliissutaasinnaasut aatsaat taama annertutigisut uani eqqartorneqaramik. Navianartortaraalu sulisut akileraarutaasa saniatigut iluanaarutissartai ukiorpaalussuit aatsaat qaangiuppata takkuttuuttussaapput, taamaammat isumaqarpunga Kalaallit Nunaat sallunaveeqqutitut aningaasaleeriaatsimik pitsaanerusumik, Kalaallit Nunaannut iluaqutaanerusumik ujarlerniarsinnaanermik Sulisitsisut Peqatigiiffiata uani oqariartuutaa isumaqatiginartorujussuusoq, Hermann Berthelsen oqarpoq, nangillunilu:

-Sulisuinnaat akileraarutaat Alcoa-p atulerneratigut soorunami ingerlaannaq aallartipajaarsinnaapput, kisiannili suliffeqarfissuit taama angitigisut, suliffinnik nunarsuarmi sumi tamaani ingerlataqartut, assersuutigiinnarlugu Coca Cola-kkut allallu, suliffeqarfittut Danmarkimut akileraarneq ajorput, uani iluanaarnartortaa takkuppat, Kalaallit Nunaatut akileraassanerlutik Alcoa-kkut? Taamaammat isumaqarpunga misissuinerit itinerusut, Kalaallit Nunaannut iluaqutaasinnaanerujussuit ujartorniarneqarneranik Sulisitsisut Peqatigiiffiata oqariartuutaa isumaqatiginartorujussuusoq, Sisimiuni borgmesteri, Hermann Berthelsen, naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq