Kommuninut qinersineq: Hermann Berthelsen sassaqqissanngilaq

- Kommunip ingerlalluarnerani aammalu nuannersumik suleqatigiinnerit ingerlanerini tunuaruma pitsaanerusoq, taamaalillunga imminut aamma iluarisimaarnera annertunerussammat. Uanga misigisimagama massakkut tassa borgmesteritut aammalu kommunalbestyrelsemi qinigassanngortinngikkuma pitsaanerusoq, Qeqqata Kommuniani borgmesteri, Siumumeersoq Hermann Berthelsen oqarpoq.  

Sisimiut Kommunerisimasaanut kommunalbestyrelsimut 1983-imi qinigaagami, Hermann Berthelsenip politikikkut sulinera aallartippoq.

Sisimiuni1999-imi borgmesterinngorpoq, taamani borgmesteriusoq Simon Olsen, Jonathan Motzfeldtip naalakkersuisuini aalisarnermut piniarnermullu naalakkersuisunngormat.

Ukiut 18-it qaangiussimalerput, pisoqarfiusimaqaallu, borgemesterili tulluusimaarutigisaminik angusarisimasaminik erseqqissaanissaminut tunuarsimaarpoq.

- Tulluusimaarutissarpassuarnik ulikkaavippoq, taamaammat ataasiakkaarlugit taarusunngilakka. Isumaqarpunga innuttaasut namminneq soqutigisatik aallaavigalugit takusinnaagaat suut pitsaanerpaat Qeqqata Kommuniani anguneqarsimanersut, taamaammat innuttaasunut taanna apeqqut tunniukkusunneruvara, borgmesteri tunuarsimaalaartoq oqarpoq.

Sunalu iluatsippallaarsimannginnersoq aperiganni tunuarsimaalaarneq ingerlaqqittaraaq. 

- Ataasiakkaanik aamma uani taaguerusunngilanga, kisianni inuuneq ingerlaqqittarpoq. Uani iluarsinngisat tulliani misilinneqarsinnaapput,  Hermann Berthelsen KNR-imut oqarpoq.

Borgmesteri 60-inik ukiulik Ilinniarfissuarmiit 1979-imi ilinniartitsisutut naammassivoq, siunissarli qanoq isikkoqarnersoq inuttaata kisimi ilisimagunarpaa, anngigisaqarpalulaarpormi.

 - Ima suli utoqqaatigilertiginnginnama, taava piffissap tulliuttup takutikkumaarpaa qanoq ingerlariaqqissanersunga, Hermann Berthelsen oqarpoq.

Apriilip ulluisa sisamaanni kommuninut qinersinerup kingorna, Hermann Berthelsenip pisortatigoortumik borgmesteritut atorfini maajip aallaqqaataani ingerlateqqissavaa.