Henrik Leth: Qajaq Trawl unioqqutitsisimanngilaq
Kilisaatini APV-mik takussutissaqarneq inatsisaasoq, ilisimasallit arlallit nalunaarutigaat. Taamaakkaluartoq Qajaq Trawlimik piginneqataasup, Søren Brandtip oqaatigaa, Sulisitsisut Peqatigiiffiannit nalunaarfigineqarsimalluni, APV-mik takussutissaqarneq inatsisini allassimanngimmat - taamalu oqarnera Sulisitsisut Peqatigiiffiata, GA-p, pisortaanit, Henrik Leth-imit, taperserneqarpoq.
- Imarsiornermi APV-p atuutsinneqarnissaa inatsisini allassimanngilaq, Henrik Leth oqarpoq nangillunilu.
- APV-mut taarsiullugu, kilisaatini inuttat atatsimiisitaliorsinnaapput ajutoornerit pinngitsoortinnissaat siunertaralugu, taamaattoqarpallu tamanna APV-tut pingaaruteqartigaaq. Taamaattumik APV-p qanoq paasineqarsinnaaneranut allatat qanoq paasissanerlugit apeqqutaaginnarpoq.
- Soorunami kilisaatini sulinermi inatsit malinneqartussaq atuuppoq. Taasumali saniatigut APV-mik malittarisassaliortoqarsinnaavoq inatsisit atuuttut saniatigut.
Inatsisinut atuuttunut paasinninnera Henrik Leth-ip taamaappoq, naak allat, ilaatigut kilisaataatillit aamma Fiskeriets Arbejdsmiljøråd killormoortuanik oqaraluartut.
Henrik Leth-illi tikkuarpaa, kilisaatini isumannaattumik sulissagaanni inuttat oqaloqatigiissinnaanerat pingaaruteqartoq.
- Sillimaniarnermut tunngasut kilisaatini inuttat oqaloqatigiisutigisinnaavaat APV atuutsissanerlugu imaluunniit naamik, Henrik Leth oqarpoq.
Paatsoorneqarsinnaanngilarli, Imarsiornermik nakkutilliisoqarfiata paasiniaasartuisa nalunaarumminni allassimasaat, tassalu kilisaammi Markusimi inuttat sillimaniarneq pillugu ataatsimiititaliaqarsimanngimmatalunniit aammalu APV-mik takussuitissaqarsimanngimmat. Tamannalu tunngavigalugu GA siumut eqqarsaateqarpoq:
- Ajutoornerup kingorna kilisaatini pissutsit sooruami aaqqinniartariaqarpavut, aammalu ajotoortoqarsinnaanera sillimaffigisariaqarlutigu ilaasortatsinnut saqqummiutissavarput siunissami sillimaniarnerulertariaqartut, Henrik Leth oqarpoq.
Imarsiornermik Nakkutilliisoqarfiata ullut 14-nit ingerlaneranni Paasiniaasartoqatigiit nalunaarusiaat isummerfigissavaat, tamatumalu kingorna Qajaq Trawl eqqartuussivinnut tunniutissanerlugu aalajangiiffigissallugu.
