Henrik Leth: Kinamiut umiarsuaataat peqataatinnagit avaleraasartoortassat tamakkeruminaapput
Ukioq manna avaleraasartuunik pisat siornamut naleqqiullugit amerlanerusussatut isikkoqarput, Henrik Lethilu Sulisitsisut peqatigiiffianneersoq aamma isumaqarpoq kalaallit aalisariutaasa pisassiissutinit 35.000 tonsinik pisaat naammagisimaarneqarsinnaasut.
Ajornartorsiulli pisassiissutini allamiut umiarsuaannik aalisarneqartussaniittoq, Henrik Leth isumaqarpoq.
Allamiut umiarsuaasa aalisarnermut peqataanissaannik akilersinnaajunnaarsitsillutik Naalakkersuisut piumasaqaasersuisimanerat paasiuminaatsippaa.
- Uggornartippara, akitsuusersuinermut politikkimik tulluarnerusumik suliaqartoqarsimasuuppat allamiullu aalisariutaasa peqataanissaat akuerineqarsimasuuppat allamiut umiarsuaannik amerlanerusunik aalisarnermi matumani peqataatitsisinnaanerput periarfissaagaluarmat. Nunami aalisartoqarfissuaq Kina aalisarnermut peqataanissaminut mattussaaqqavoq. Tamatumalu kingunerisaanik aningaasatigut akilersinnaasumik ingerlatsinissatsinnut aalisariutinik pissarsisinnaasimanngilagut, Henrik Leth taama oqarpoq.
Pisassiissutit tamakkerneqanngippata avaleraasartuunut akitsuutitigut nunatta karsiata pissarsiassai ikinnerussapput, tamatumunngalu peqatigitillugu Tunup imartaani avaleraasartooqassuseq uppernarsaaserneqassanngilaq.
Tamannalu Kalaallit Nunaata nunat atlantikup avannaamiut avaleraasartoortassaat pillugit siunissami isumaqatigiinniarnermut periarfissaanik sanngiinnerulersitsissaaq, Sulisitsisuneersoq taama oqarpoq.
- Tamatuma malitsigisaanik naalagaaffiit sineriallit siunissami isumaqatigiissuteqarnissaanni Kalaallit Nunaat ilanngunneqarpat nunatta pissarsiassai ikinnerulersinnaapput. Tamannalu matumani ajornerpaajusutut oqaatigineqarsinnaavoq.
