Henrik Kudsk: Suliaq nuannarisaq qimallugu artornarpoq

Henrik Kudsk sakkutooqarfimmi qullersatut ippassaq tunuarpoq, Issittumilu Sakkutooqarfiup pisortatigoortumik ippassaq atoqqaarfissiortinneqarnerata kingorna sakkutuut imarsiortut naalagarisimasaat taanna, radioaviisip ullaap tungaani oqaloqatigaa, taannalu killitsisimaalaarpoq.

- Illersornissaqarfimmi ukiut 40-t sinnilaarlugit sulivunga, Kalaallit Nunaanniinneralu nuannernerpaajugunarpoq. Taamaammat suliffik nunalu taama nuannertigisoq qimassallugu artornalaarpoq, sakkutuut imarsiortut naalagaat, Kangilinnguanilu Sakkutooqarfimmi maannamut pisortaasimasoq, Henrik Kudsk, oqarpoq.

Issittumi Sakkutooqarfik Nuummi pisortatigoortumik ippassaq atoqqaarfissiorneqarpoq, Danmarkip illersornissamut ministeria Nick Hækkerup Ataqqinartorsuarlu Dronning Margrethe ilaatigut peqataallutik:

- Issittumi Sakkutooqarfiup atoqqaarfissiorneqarneranut peqataasinnaanera nuannaarutigeqaara, Dronning Margrethe oqalugiaammini ilaatigut oqarpoq.

Kangilinnguani Sakkutooqarfik maanna atorunnaarpoq, Kangilinnguanilu sulisimasut sulilluarsimanerannik maannamut pisortaasimasup Henrik Kudskip qutsavigai:

- Kangilinnguani sulisimasut oqarfigerusuppakka: Bravo Zulu, qallunaatoorluguluunniit: Sullilluarsimanissinnut qujanaq, Henrik Kudsk ippassaq oqarpoq.

Soorlu taanna oqartoq nuannarisimasaminit tunuarneq artornartarpoq, Issittumili Sakkutooqarfimmut ikaarsaarneq pissusissamisuuginnartoq aamma oqaatigaa:

- Pisut pingaarutillit nalaanni siuttuusimallunga isumaqarpunga. Piffissammi taassuma iluani pisut amerlaqaat, nunami maani nunanilu allani. Namminersorneq pillugu inatsit 2009-mi atulerpoq, silallu pissusaata allanngoriartornera pissutaalluni Kalaallit Nunaat soqutigineqaleraluttuinnarpoq. Taamaammat pissutsit taamaalineranni siuttuusimanera tulluusimaarutigeqaara, Henrik Kudsk oqarpoq.