Helle Thorning-Schmidtip ataatsimiititaliassami peqataajumannginnera isornartorsiorneqarpoq

Aviisi Jyllands Posten nittartakkamini ullumi taama allaaserisaqarpoq.

Danmarkip Nunatta Danmarkillu akornanni Saammaasseqatigiinnissaq pillugu ataatsimiititaliami peqataannginnissaa, Danmarkip statsministeriata Helle Thorning-Schmidtip nalunaarutigimmagu, Inuit Ataqatigiit sinnerlugit Folketingimut ilaasortaq Sara Olsvig, Doris Jakobsenilu, Siumumeersoq, qisuariaateqarput, uggoralugulu statsministeri taama oqaaseqarmat:

Saammaasseqatigiinnissamut suliassaq Nunatsinni suliassaasoq, Sara Olsvigip oqaatigaa, suliassarli qanorpiaq imaqassanersoq suli nalunarpoq, Naalakkersuisummi isumaliutissiissummik suli saqqummiussaqanngimmata. Nunatsinnili sulinerup saniatigut Kalaallit Nunaata Danmarkillu akornanni saammaasseqatigiinnissaq pillugu suliassaqartugut, Sara Olsvig oqarpoq, imatullu nangilluni:

- Suliassaq siunissami soorunami aamma ingerlasuusinnaavoq, aamma isumaqarpunga ullumikkut ingerlareertoqartoq, assersuutigalugu inatsisitigut ataataqanngitsut pillugit suliaq maannakkut ukiut arlallit ingerlareerpoq. Nalunaarusiortoqarpoq 2010-mi naammassisumik, inatsisitaalu massakkut suliarineqarluni. Taamaammat saammaasseqatigiinnissamut suliassamut danskit statsministeriata peqataarusunngiivinnera eqqumiigaara, Inuit Ataqatigiit sinnerlugit Folketingimut ilaasortaq, Sara Olsvig, oqarpoq.

Danmarkip Nunatta Danmarkillu akornanni Saammaasseqatigiinnissaq pillugu ataatsimiititaliami peqataajumannginnera, Siumut sinnerlugu Foleketingimut ilaasortamit, Doris Jakobsenimit, aamma uggorineqarpoq:

- Pinikorpassuit assigiinngitsut eqqarsaatigalugit isumakkeeqatigiinnissaq misigissutsitigut assigiinngitsutigut pisariaqartinneqarpoq. Siornatigut nunasiaataasimanitsinni piusimasut, taavalu aamma kingunerisimasai tamakku qaqilerlugit oqaluuserineqarnissaat ilaatigut aamma pisariaqartinneqarpoq. Nunat taakkua akornanni ajornartorsiutaasartut soorlu aamma oqaluuserinissaat pisariaqartinneqartarmat. Taamaalilluta aamma annernartuusinnaasut oqaluuserilluareerlugit taava Nunatsinni nukivut atorlugit ingerlaqqinnissarput annerusumik suliarisinnaagatsigu, Siumut sinnerlugu Folketingimut ilaasortaq, Doris Jakobsen, oqarpoq.

Kalaallit Nunaata nammineerluni ingerlariaqqissinnaanera, Inuttut pisinnaatitaaffinnik illersuiniaqatigiiffiup, Amnesty Internationalip, qullersaata tulliata, Trine Christensenip, oqaatigaa, Danmarkilli Nunatta Danmarkillu akornanni Saammaasseqatigiinnissaq pillugu ataatsimiititaliassamut peqataajumannginnera uggoraa, ataatsimiititaliarmi Danmarkip pissarsiffigisinnaagaa oqaatigaa, soorlu nunani allani taamaattoqarsimasoq.

Naalagaaffeqatigiinnerup killiffia pillugu ukiumoortumik nassuiaat, Folketingimi apriilip ulluisa 29-anni oqaluuserineqartussaavoq.