Helle Thorning-Schmidt kukkusumik paasissutissiisimavoq
Tassami e-mailimi ministereqarfimmut allappoq oqaluttuarsimanerminit allaanerusumik uini ukiumi ulluni amerlanerujussuarni Danmarkimiittartoq.
E-mailikkut allakkami Inatsisinik atortitsinermut ministereqarfimmukartumi aviisip BT-p paasiniarsimasaani Helle Thorning-Schmidt uimi nunami allamiutut innuttaassuseqarnissaata akuersissutigineqarnissaanik qinnuteqarsimavoq illuminnik piginneqataasussatut.
E-mailimi Socialdemokratit siulersortaat allappoq uini ukioq kaajallallugu tallimanngornermiit ataasinngornermullu Danmarkimiittartoq, taakkualu katikkaanni ukiumut 208-nngorlutik. Ullup unnuallu aallartinneri tamarmik akileraarutinik naatsorsuinermi ilanngunneqartussaapput. Taakkualu ullunit amerlanerpaanit Helle Thorning-Schmidtip nassuiaataanit 180-iusunit amerlanerungaarput uia Danmarkimut akileraartussaassanngippat.
Paasissutissanut imminnut assortuuttunut Konservativini akileraartarnermut tunngasunut oqaaseqartartoq Michael Tast oqarpoq:
- Tamanna ingasalluinnarpoq, paasissutissat Danmarkimi politikerinit nuimasunit tunniunneqartut upperinissaat uatsinnut pingaaruteqarpoq. Taamaattumik Socialdemokratit siulittaasuat piaartumik nassuiaaqquneqarpoq, Michael Tast oqarpoq.
Tassami ministeriunertut qinigassanngortikkaanni oqaatsit oqaaserineqartut ilumoortuunissaat uppernartuunissaallu qularutigisariaqanngillat, aviisimmi uppernarsarpaa ilumoornissaq uukapaatitsissutigineqartoq taamaattumik pisut ataqatigiinnerat nassuiarneqartariaqarluni, Michael Tast naggasiivoq.
Dansk Folkepartiip maanna suliassaq inatsisit malillugit nalilerneqaqquaa.
