Ukiuni 2007-mi, 2008-mi aamma 2009-mi Danmarkimi najugaqarsimannginnini pillugu Danmarkimi akileraartussaanngilaq. Socialdemokratit siulittaasuata Helle Thorning-Schmidtip aalajangiineq iluareqaa.
- Maleruaqqusat tamarluinnaasa maleqqissaarsimagivut aalajangiinikkut naqissuserneqarpoq, Helle Thoning-Schmidt oqarpoq.
Skat-ip aalajangiinermigut Helle Thorning-Schmidtip uia 2009-mi akileraartussaannginnerarpaa tamannalu Thorning-Schmidtikkut suliap aallartinneranilli oqaatigiuarpaat.
- Skat-ip suliaq peqqissaarullugu suliarivaa paasissutissat perusutatik tamarluinnaasa qinnutigisinnaasimammatigit tamanut toqqissisimalersitsivoq, Helle Thorning-Schmidt oqarpoq.
Helle Thorning-Schmidtip uia 2007-imi 2008-mi 2009-milu akileraartussaasimanngilaq Helle Thorning-Schmidtilu pisoq pillugu paasisimasaqaqqissaanngitsut isummersorniarsimanerat tupigusuutigeqaa.
-Namminneq pissapput, kisianni tassa taamaappoq inooqataaffigiinnartariaqarparpullu, Thorning-Schmidt oqarpoq.
Suliap oqallisigineqarnerani peqqissimissutissaqarnersoq aperineqarami naaggaarpoq oqarlunilu:
- Skat-ip paasissutissat perusutai tamaasa tunniuppavut, suliaq peqqissaarlutik nalilersorpaat taamaammat peqqissimissuteqanngilanga, Helle Thorning-Schmidt oqarpoq.
Skat-ip aalajangiinermini tunngavilersornera quppernernik qulingiluanik takitigaaq taannalu tamaat Helle Thorning-Schmidtip saqqummiukkusunngilaa "paasissutissat imminerminnut tunngasut amerlammata" tusagassiuutinut nalunaarummini taama allappoq.