Helle Thorning-Schmidt eqqunngitsumik paasissutissiisimavoq
Tassa politikkikkut akerlerisai taama oqarput.
Taakkua ilagaat Venstret gruppianni siulittaasoq Christian Jensen:
- Tamanna Helle Thorning-Schmidtip eqqaamanerlunneranut ersiutaanngikkuni ilumoorniarneq pisumut naleqqussarniarsimassavaa, Christian Jensen oqarpoq.
Paasissutissat eqqortuunngitsut tunniunneqarput Inatsisinik atortitsinermut ministereqarfimmut e-mailimik siorna nassiussimmat uimilu Stephen Kinnockip Østerbromi ilaqutariit illuannik kisimi piginneqataanissaa qinnuteqaatigalugu.
Tassani allappoq uini sapaatip akunnerisa naaneri tamaasa Danmarkimiittartoq. Ullumikkulli paasissutissat taakkua peqqissaarussinnginnermit kukkunertut taavai soorunalimi utoqqatsissutigalugit. Tamatumanili kukkuneq qaangiinnagassaq pineqanngilaq, taama isumaqarpoq Dansk Folkepartimi akileraarutinut tunngasunut oqaaseqartartoq Mikkel Dencker.
- Ministeriunerujumagaanni malittarisassat inuiaqatigiinni innuttaasunut tamanut atuuttut malinneqartariaqarput, tamatumunnga atatillugu Helle Thorning-Schmidt taamaaliorsimanngilaq.
Socialdemokratilli aningaasanut tunngasunut oqaaseqartartuata Morthen Bødskovip partiip uppernassusia suliami tamatumani ajoquserneqarnersoq takusinnaanngilaa.
- Helle Thorning-Schmidt tatigineqarnissaminik ajornartorsiuteqanngilaq. Oqarpoq kukkusimalluni, kukkunerlu taanna iluarsillugu.
DR-ip nutaarsiassaqartitsiviani partiit siulittaasuinik naliliisitsinermi suliarineqartumi aammattaaq Helle Thorning-Schmidt tapersersorneqarpoq, taakkualu amerlanersaasa kukkuneq ajuusaarnarnerarlugu kinguneqartinneqartariaqanngitsoq. Tamannali Helle Thorning-Schmidtip tapersersuisuisa kisimik aalajangertariaqanngilaat, taama isumaqarpoq Konservativit akileraartarnermut tunngasunut oqaaseqartartuat Michael Gard.
- Helle Thorning-Schmidtip kukkusumik paasissutissiisimanini nassuerutigaa, maannalu oqartussaasut tamatuma qanoq nassuiarnissaa aalajangertariaqarpaat, Michael Gard oqarpoq. Venstret inuusuttaasa Socialdemokratit siulittaasuat politiinut nalunaarutigaat. Nuna tamakkerlugu siulittaasup Jacob Engel Schmidtip suna pissutaanersoq ima nassuiarpaa:
- Taamaaliorpunga pissutigalugu kikkut tamarmik inatsisitigut naligiimmata, kikkut tamarmik apeqqutaatinnagu nalinginnaasumik sulisuuneq Danmarkimiluunniit Socialdemokratinut siulittaasuuneq. Socialdemokratit siulittaasuata taama erseqqitsigisumik pisuusimanerani marloqiusamillu pissusilersornerani immaqalu naalagaaffiup aningaasaataanik pasinapiluttumik nalorninartumillu atuisimasinnaanerani iliuuseqannginnissaq ajornakusoorpoq, Jacob Engel Schmidt naggasiivoq.
