Helikopteri atorlugu ujajaaniarnikut eqqartuunneqalerput

Siorna pingasunngornermi septembarip 23-anni ujajaaneq pivoq.

Ullaakkut nalunaaqutaq 05:21 Stockholmip kangiatungaani aningaasanut nalilinnullu allanut toqqorsiviup qalianut helikopteri mippoq. Angutit kiinarpalersorsimasut sakkulersorsimasullu qaartiterutissat tummeqqallu atorlugit ininut aningaasat toqqorsiviannut isaapput.

Matut saviminermut pilattuutinik innaallagissamoortunik pilattorpaat puullu aningaasanik imallit helikopterimit amuartarlugit issorarlugit.

Minutsit 20-t qaangiuttut helikopteri tingeqqippoq angutit ilaasoralugit aningaasallu qallunaat aningaasanngorlugit 30 millionit sinneqalaartut nassarlugit, DR taama allappoq.

Svenskit politiivi takkukkasuarput, namminnerli helikopteritik qangattartissinnaanagit, tassami taakkunani inissisimaffimmik silataanniittuni qaartartut marluk inissinneqarsimagunarmata, taakkuali qaartartuusaartinneqartut paasinarsilluni.

Qaammatit tulliuttut ingerlaneranni angutit arlallit svenskit politiivinit tigusarineqarput, taakkunannga qulit peqqarniitsumik ujajaanermut ikiuussimasutut ujajaasimasutulluunniit pasineqarlutik.

Unnerluussisup Leif Görtzip Stockholmimi eqqartuussivimmi inimi immikkut isumannaallisakkami ullaap tungaani matumani unnerluussutitut immikkoortut saqqummiussorlugit aallartippai. Angutit taakkua eqqartuunneqassasut taanna soorunami isumaqarpoq neriullunilu, svenskilli radioaviisiannut erseqqissarlugu angutit taakkua qulit ujajaasimanerminnut misiartut isumaqartullu eqqartuussinissamut uppernarsaatit amigartut.

- Taakkua eqqartuunneqarunik ukiut qulit angullugit parnaarsussaasinnaapput. Aningaasat ujajaanermeersut nassaarineqanngillat taakkualu politiinit suli paasiniarneqarlutik, Leif Görtz oqarpoq.

Politiit ilaatigut isumaqarput toqqorsivimmut tassunga arlaat nalunngisaqarsimasoq ujajaasunullu ikiuulluni, taakkuami toqqorsivimmut iseramik sumorpiaq ingerlassanerlutik nalusimanngilaat.

Eqqartuussinermut ullut 18-it atugassanngortinneqarput, taamaalillunilu eqqartuussinerup inernera aatsaat qaammammi tullermi pisinnaassalluni.