Helge Sander isumaqataanngilaq
Qalasersuup imartaanik piginnittussaaneq siunertaralugu amerikkamiut russit canadamiullu pinnaatileruttornerisa kingunerisaanik Pinngortitaq pillugu nunarsuaq tamakkerlugu suliniaqatigiiffissuaq WWF piumasaqaatitalerlugu isummerpoq.
-Sikuiuitsumi avannarlermi avatangiisit illersorneqartariaqarput, soorlu sikuiuitsumi kujalermi avatangiisit illersorneqarnissaat pillugu nunat tamalaat 1959-imili isumaqatigiissuteqartut, taamaattumik silap allanngoriartorneranit sunnigaaqisumi Qalasersuup imartaani gassamik uuliamillu qalluinissat killilersorneqartariaqarput, taama suliniaqatigiiffissuarmeersut piumasaqarput, piumasallu tamatuma piviusunngortineqarsinnaanissaa danskit ilisimatusarnermut ministeriata Helge Sanderip qularilluinnarpaa.
- Piumasap qanoq kinguneqarsinnaanera eqqoriarsinnaanngilluinnarpara aamma Qalasersuup imartaata naqqani pisuussutinik danskit atuiumajunnaarumasinnaanerat naatsorsuutiginngilara, Helge Sander nutaarsiassaqartitsivimmi Ritzaumi taama issuarneqarpoq.
Pinngortitaq pillugu suliniaqatigiiffissuarmiut piumasaqaatertik suleqatigiiffiit allat aqqutigalugit siammarterniarpaat, ilaatigut Issittumi Siunnersuisoqatigiit, amerikkamiut russit canadamiullu ilaasortaaffigisaat aqqutigalugit.
Helge Sander oqarpoq issittumik illersuinissaq ukiuni tulliuttuni eqqartorneqassasoq taamaattorli issittup illersorneqarnissaa pillugu soorlu Naalagaaffiit Peqatigiit pisinnaatitaaffinnik aalajangersaateqarnissaannut ammanerarpoq.
